Ditë pas një qetësimi të situatës së nxehur me nuanca studentore para Ministrisë së Arsimit, asaj nga reagimi i maturantëve nga padokortësia me llojin e pyetjeve nga testi i letërsisë, ia behu një reagimi i ministres Besa Shahini. Në të, ajo, i referohej një thirrjeje nga brenda protestës, pra nga vetë maturantët, sipas së cilës, ajo duhet “kthyer nga ka ardhur” (nga Kosova).
Publikisht nuk është dëgjuar kjo lloj thirrjeje, por nuk është çudi të mos jetë thënë. Sepse i përngjan atyre ofezave të zakonshme me të cilat “pasurohet” sa hetë gjuha e rëndomtë politike, ajo më plebeje, ku ndërfuten pra dhe cenet e tjetrin, një lloj bullizmi politik. Më monumentali është “Saje qorri”, një produkt “Made in Berisha” për Saimir Tahirin.
E sipas ministres Shahini, edhe “kthimi nga ke ardhur”, është fyes, diskriminues, gati racist, e në finale dhe përçarës në terma atdhetarë. Pasi është fjala për Kosovës, për një bashkëkombase pra, e cila, siç kërkon të thotë, përbën një urë përbashkuese kombëtare duke qenë në qeverinë e Tiranës. E në vend të kësaj, gjuha e maturantëve….por jo, ajo nuk pranon se është e maturantëve, duke ia adresuar këtë opozitës, edhe pse e dalë nga gojë maturantësh.
Pra, duke kërkuar të drejtën e saj, znj.ministre lehtësisht shenjon padrejtësisht opozitën, pasi publikisht apo literalisht, askush nga opozita nuk e ka thënë diç të tillë. Edhe në e patçin thënë maturantët, siç ajo në fakt e potencon, jo domosdoshmërisht ka implikime politike aty, aq më pak nga opozita, gjersa nuk sjell një provë reale të këtij implikimi, në daç në protesta e në daç në frazën bulliste.
Protesta e maturantëve, me gjithë nonsenset e saj, ashtu naive, dukshëm që nuk kishte kurrfarë prapaskene opozitare. Eshtë tjetër gjë nëse opozita iu qas në përkrahje, në daç dhe në nxitje, por dhe ky s’është mëkat; është brenda frymës së një opozite që të mbajë gjallë opozitarizmin në të gjithë format, edhe duke shfrytëzuar pakënaqësitë e ardhura ngado. E ka gabim? Le ta ketë. Në zgjedhje do marrë notën e strategjisë së saj me gjuhën e votës: abuzimit nëse ka abuzuar, apo të kundërtës së saj.
Në rastin konkret, znj.Shahini, e cila e ka të mbushur reagimin e saj me kryqëzimin e opozitës si autore reale e “kthimit nga ke ardhur”, ka tejkaluar të drejtën e saj për t’u ndjerë keq, edhe për t’u përgjigjur gjithashtu, duke produktuar një teprim, deri në akuzë pa bazë, e kësisoj deri në shpifje, në atë që pas thirrjeve të maturantëve qëndron opozita.
Edhe njëherë: opozita është në lirinë por dhe të drejtën e saj, që të përkrahë maturantët e këdo, pse jo, edhe t’i nxisë për të reaguar, por kjo nuk do të thotë që me patjetër është ajo autorja e frazës djegëse.
Në këtë pikë, opozita ka të drejtë ta akuzojë znj.ministre si nxitëse e një përçarjeje kombëtare, gjersa është akuzuar prej saj si e tillë pa asnjë provë por vetëm me hamendësime. /tesheshi.com/
