Presidenti turk Rexhep Tajip Erdogan tha të enjten, një ditë pas arrestimit të kryebashkiakut të Stambollit, Ekrem Imamoglu, se Partia Popullore Republikane e opozitës po përpiqet të mbulojë gabimet e veta dhe të mashtrojë qytetarët me “teatër”.
Madje ai shkoi deri aty sa fajësoi opozitën, duke thënë se pikërisht për shkak të tyre doli në dritë çështja e diplomës (të anuluar) të Imamoglut, që shkaktoi krizën.
Ky ishte komenti i parë i Erdoganit për arrestimin e kryebashkiakut të Stambollit dhe një kundërshtari kryesor politik.
Duke folur për diplomën e Imamoglut, presidenti turk tha se CHP-ja, mediat e saj dhe strukturat e tjera nuk mund t’i përgjigjen asnjëherë akuzave të drejtësisë si për çështjen e diplomës ashtu edhe për çështjen e korrupsionit për të cilin ai akuzohet.
Në vend të kësaj, “ata po e reduktojnë çështjen në slogane politike dhe po përpiqen të mashtrojnë kombin,” tha ai.
Ai e përshkroi përpjekjen e opozitës për të paraqitur konfliktet e saj të brendshme si çështjen më të rëndësishme të vendit si “kulmin e hipokrizisë”. Madje, ai akuzoi personazhet e opozitës, duke thënë se ata “kanë humbur ekuilibrin” dhe po shkojnë deri aty sa të sulmojnë policinë tonë dhe të “kërcënojnë gjyqtarë, prokurorë dhe gjykata”.
Nëse na thonë “vëlla, nuk ka vjedhje, korrupsion, parregullsi, punë të dyshimta në bashki”, mund ta diskutojmë me prova, vazhdoi ai, duke shpjeguar se “nuk mund ta bëjnë sepse ata vetë e dinë më mirë se të gjitha këto dhe shumë të tjera janë të vërteta”.
Erdogan theksoi se “shumica e këtyre informacioneve dhe dokumenteve janë transferuar në gjyqësor nga anëtarët e partisë së tyre”. “Është gjithashtu e qartë se shumica e zyrtarëve të CHP-së, të cilët derdhin lot krokodili para publikut, janë të gëzuar pas dyerve të mbyllura, sepse kanë neutralizuar kundërshtarët e tyre në betejën e brendshme partiake”, tha Erdogan.
“Nuk kemi kohë për të humbur në diskutime të kota, as pirgje parash për t’i hedhur pa menduar”, tha ndër të tjera ai.
Problemet e Partisë Popullore Republikane “nuk janë çështje të vendit, por të një grushti oportunistësh”, vazhdoi ai. “Nuk kemi kohë të humbim me teatrot e opozitës”, shtoi Erdogan.
“As personalisht, as si parti, as si aleancë nuk kemi kohë për spektaklet e opozitës. Jemi të zënë me axhendën reale të vendit, shikojmë vetëm punën tonë dhe fokusohemi në qëllimet tona”, përfundoi Erdogan. /tesheshi.com/
