Tërheqja e Nico Rosberg-ut, kampionit të saposhpallur të Formulës 1, ka qenë lajmi më i bujshëm sportiv i ditës së djeshme. Për shumë ka qenë një rrufe në qiell të hapur, por jo për rivalin e tij më të madh, Lewis Hamilton-in.
“Kjo është hera e parë që ai ka fituar (një titull) në 18 vite, prandaj nuk ishte një befasi që vendosi të ndalojë,” ka thënë britaniku në reagimin e tij të parë.
“Ai ka gjithashtu një familje për t’iu përkushtuar, dhe dëshiron më shumë fëmijë, e Formula 1 merr shumë nga koha juaj.”
“Do të më mungojë rivaliteti?”
“Sigurisht”, pohon Hamilton, që tani pret të mësojë emrin e shokut të ri të skuadrës.
Ndryshe Hamilton-it, që prej vitesh e njeh mjaft mirë Rosberg-un, vendimi i gjermanit i ka lënë pa gojë shumë bashkëgarues.
“Bum! Nico, ju vërtet na befasuat. Kampion i madh…,” shkruan Carlos Sainz në rrjetet sociale.
“Përfundimisht një kampion i madh! Admirim i madh. Respekte Nico Rosberg,” është reagimi i Sergio Perez-it.
“Respekte miku im,” thotë një tjetër pilot, Romain Grosjean.
“Shumë të habitur! Por respekti më i madh. Kampion i madh. Gëzo kapitullin tjetër në jetë…,” ka shkruar në Twitter Marcus Ericsson.
Vendimi i Rosberg-ut për t’u larguar nga pilotimi në Formula 1 pritet të jetë i shumëdiskutuar dhe në ditët në vijim. /tesheshi.com/
