Nuk kanë vonuar reagimet e figurave politike europiane për referendumin britanik dhe për rezultatin e tij.
I pari ka qenë ministri i Jashtëm gjerman, Frank-Walter Steinmeier, i cili ka reaguar përmes një postimi në Twitter, “Ngjan një ditë e trishtuar për Europën dhe për Mbretërinë e Bashkuar.”
Presidenti i Parlamentit Europian, Martin Schulz, ka deklaruar sot se pret që negociatat për largimin e Britanisë nga BE-ja të nisin shpejt.
“Mbretëria e Bashkuar ka vendosur të shohë punën e vet. Mendoj se të dhënat ekonomike tregojnë këtë mëngjes se do të jetë një rrugë shumë e vështirë.”
Shefi i Komisionit Europian, Jean-Claude Juncker, është shprehur se BE-ja nuk do të bëhet copë për ta ndihmuar Britaninë në rinegociimin e marrëveshjeve tregtare me vendet nën ombrellën e BE-së.
Manfred Weber, udhëheqësi i Partisë Popullore Europiane, ka qenë disi i ashpër: “Nuk mund të ketë trajtim të veçantë për Mbretërinë e Bashkuar. Populli britanik ka shprehur dëshirën e tij për ta lënë BE-në. Largim do të thotë largim!”
Ministri i Financave i Japonisë, Taro Aso, ka bërë të njohur në një konferencë shtypi se vendi i tij është tejet i shqetësuar për rreziqet për tregjet dhe ekonominë globale.
Kryeministri çek, Bohuslav Sobotka, është i mendimit se BE-ja duhet të pajtohet me largimin e Britanisë “shpejt dhe racionalisht”. “Projekti europian kërkon më shumë mbështetetje të fuqishme të qytetarëve të vet,” kanë qenë fjalët e tij.
Ndërsa Marine Le Pen, udhëheqësja e Frontit Nacional në Francë, një parti e ekstremit të djathtë dhe kundër të huajve e emigracionit, ka shpërthyer nga gëzimi, duke shkruar në Twitter, “Fitore për lirinë! Siç kam kërkuar për vite, tani është e nevojshme që Franca dhe të gjitha vendet e BE-së të kenë një referendum.”
Thirrje për një referendum në vendin e tij ka bërë dhe ekstremisti i djathtë holandez, Geert Wilders.
“Urra për britanikët!”, shkruan ai në Twitter. “Tani është radha jonë. Koha për një referendum holandez!” /tesheshi.com/
