Në të parën rezolutë që Këshilli i Sigurimit ka miratuar në thuajse tetë vite në lidhje me Izraelin dhe palestinezët, kërkohet që të ndalohet aktiviteti izraelit i ngulimeve në territoret e pushtuara palestineze.
Një ditë pasi Egjipti e tërhoqi atë për shkak të presionit nga Izraeli dhe presidenti i zgjedhur amerikan, Donald Trump, rezolutën e paraqitën për votim Zelanda e Re, Malajzia, Venezuela dhe Senegali. Amerikanët abstenuan në votim, çka bëri që rezoluta të miratohej me 14 vota në favor.
Palestinezët reaguan me gëzim pas miratimit të rezolutës. “Kjo është një ditë fitoreje për ligjin ndërkombëtar… një mohim i plotë i forcave ekstremiste në Izrael,” u shpreh Saeb Erekat, kryenegociatori palestinez për agjencinë e lajmeve Reuters.
Në të kundërt, Izraeli nuk pranoi ta njohë rezolutën, duke reaguar ashpër ndaj miratimit të saj.
“Izraeli e hedh poshtë këtë rezolutë të turpshme antiizraelite në OKB dhe nuk do t’u përmbahet kushteve të saj,” deklaroi kryeministri izraelit Benjamin Netanyahu.
Veç kësaj, Izraeli tërhoqi ambasadorët e tij në Zelandë të Re dhe në Senegal, në një gjest hakmarrjeje, ndërsa nuk ka marrëdhënie diplomatike me Malajzinë dhe Venezuelën.
Ka reaguar gjithashtu dhe Donald Trump, që ka premtuar t’i ndryshojë gjërat në OKB me të marrë detyrën e presidentit të SHBA-së.
“Sa për OKB-në, gjërat do të jenë ndryshe pas 20 janarit,” qe reagimi i tij përmes rrjeteve sociale. /tesheshi.com/
