Autoritetet ruse kanë nisur një hetim në lidhje me Mikhail Krasnoshenkos, anëtar UNMIK-ut, i cili u arrestua dhe u lirua gjatë aksionit të policisë së Kosovës të martën.
“Trajtimi ndaj tij dhe arrestimi i tij përfaqësojnë një shkelje të pamatur të së drejtës ndërkombëtare dhe normave të një shoqërie të civilizuar”, u tha nga Moska, duke theksuar se Krasnoshenko gëzon imunitet diplomatik.
Agjencitë raportojnë se hetimi do të përfshijë të gjitha detajet e arrestimit dhe do të japë një vlerësim ligjor të veprimeve të ndërmarra kundër Krasnoshenkos.
“Në përputhje me normat e së drejtës ndërkombëtare dhe vendore, Komisioni Hetimor rus ka të drejtë të iniciojë një hetim kundër trajtimit të paligjshëm të qytetarëve me imunitet diplomatik”, vijon deklarata.
Lirimi i tij erdhi pas reagimit të ambasadës ruse në Beograd dhe Ministrisë ruse të Punëve të Jashtme.
Zëdhënëse e diplomacisë ruse, Maria Zakharova, e quajti arrestimin si një “akt të egër” dhe “manifestim i politikave provokuese të shqiptarëve të Kosovës”.
Por nga ana tjetër, ministri i Jashtëm i Kosovës Behgjet Pacolli, i cili i bëri thirrje UNMIK-ut që të shpjegojë praninë e anëtarëve të tyre, duke përfshirë dhe shtetasin rusnë fjalë, në barrikadat në Zubin Potok në veri të Kosovës.
Sipas tij, Ministria e Jashtme e Kosovës do të “trajtojë çështjen sipas ligjit ndërkombëtar”.
“Kosova ka paralajmëruar shumë komunitetin ndërkombëtar për përpjekjet destabilizuese të Rusisë në rajon”, tha Pacolli.
Të njëjtin qëndrim mbajti kryeministri Haradinaj, i cili argumentoi se pavarësisht imunitetit diplomatik të organizatave ndërkombëtare, kur një person i tyre kërcënon vendin, atëherë, siç tha, “ligji do të zbatohet në bazë të konventave ndërkombëtare”.
“Është e njohur se axhenda ruse është destabilizuese dhe për këtë arsye ne duhet të punojmë me kujdes kundër një axhende të tillë”, tha Haradinaj. /tesheshi.com/
