Nga Shkëlzen Rrecaj
Pas shumë takimeve e përpjekjeve të vazhdueshme që zgjatën me muaj të tërë, Kosova dhe Serbia arritën mbrëmë t’i qesin në letër katër marrëveshje. Nënshkrimin e tyre u bënë nga krerët me të lartë shtetëror nga të dy palët. Siç edhe u raportua, këto marrëveshje kanë të bëjnë me Asociacionin e Komunave Serbe, telekomin, energjinë dhe “Parkun e Paqes” në Mitrovicë.
Por, menjëherë pas arritjes së kësaj marrëveshje kanë ardhur edhe reagimet e para.
Reagimit i prinë lideri i Vetëvendosjes, Visar Ymeri, i cili ka thënë se i tërë procesi i bisedimeve në Bruksel ka qenë i pabarabartë, rrjedhimisht i padrejtë, me karakter asimetrik ndaj Kosovës.
Ai në një status në profilin e tij në Facebook, ka thënë se nuk ka se si të dalë ky proces dialogu, i tillë çfarë është, në dobi të Kosovës, e aq më pak ta afirmojë shtetësinë e Kosovës.
“Prapë e njëjta metodë nga po e njëjta Qeveri sikur ajo e kaluara: koncesione të dëmshme e të rrezikshme ndaj Serbisë, gënjeshtër e mostransparencë për marrëveshjet, keqpërdorim flagrant e i turpshëm i parasë publike drejt rritjes së pronës private, keqpërdorim i aparatit shtetëror për heshtje të kritikës e protestës, shenjtërim i pronës së Liderit”, ka thënë Ymeri.
“Zajednica nuk ka qenë OJQ as në marrëveshjen e prillit të vitit 2013, e lëre më tash me këtë detajizim të kompetencave të saj. Në të vërtetë i tërë ky alarmim i përfaqësuesve të Qeverisë e të shërbyesve të pushtetit flet në vete për hapin e madh që sot Qeveria e Kosovës e bëri drejt bosnjëzimit të Kosovës”.
Sipas Ymerit, sa herë që bëhen koncesione të dëmshme dhe shtet-rrënuese ndaj Serbisë na del dikush nga aparati shtet-parti e flet për atë se si Kosova mund të bashkohet me Shqipërinë.
“Zajednica në vete përbën kurorëzim të ndarjes së Kosovës në vija etnike. Kështu ajo o refuzohet në tërësinë e saj, me cilëndo formë që merr, ose pranohet si parim dhe praktikë e një Kosove pa republikë e pa perspektivë zhvillimi. Qeveria e ka pranuar Zajednicën. Këta matrapazë negociatorë të udhëhequr nga kryematrapazi Isa Mustafa, janë ata që po e vjedhin pasurinë e qytetarëve për ta shndërruar atë herë në të mirë materiale të djemve e vëllezërve të tyre, e herë në pronë publike të strukturave ilegale të Serbisë”, ka thënë Ymeri.
Ymeri ka thënë se e refuzojnë atë në tërësinë e saj, edhe si parim edhe si praktikë, dhe do ta kundërshtojmë jetësimin e saj në secilin rast dhe secilën instancë.
Lidhur me marrëveshjen Kosovë-Serbi ka reaguar edhe drejtori i Lëvizjes Fol, Petrit Zogaj i cili ka kërkuar nga delegacioni kosovar që në vend të fotografive t’i publikojnë marrëveshjet e arritura në Bruksel.
Në vend që të thuhet ‘Serbia e ka pranuar Kosovën’ a bënë me e pa se në çfarë dokumenti e paska pranuar një gjë të tillë? Këta t’i transformojnë edhe konceptet bazë të transparencës. Fotografohen duke nënshkruar e nuk tregojnë se çfarë kanë nënshkruar, ka theksuar Zogaj.
Edhe publicisti Adriatik Kelmendi ka kërkuar transparencë për marrëveshjet e arritura në Bruksel. Ai në një postim në Facebook ka thënë se sa më shumë që do të shtyhet publikimi i marrëveshjeve të plota, aq më të pavlera do të bëhen garancitë e tija për marrëveshje të favorshme për Kosovën.
“Besueshmëria e deklaratave të kryeministrit Mustafa sonte për 4 Marrëveshjet është në korrelacion të drejtpërdrejtë me kohën derisa do të publikohen tekstet e marrëveshjeve.
Sa më shumë që do të shtyhet publikimi i marrëveshjeve të plota, aq më të pavlera do të bëhen garancitë e tija për marrëveshje të favorshme për Kosovën”, ka shkruar publicisti Kelmendi.
Ashpër ka reaguar edhe deputeti i PDK-së, Nait Hasani pas arritjes së marrëveshjeve në Bruksel ndërmjet Kosovës dhe Serbisë.
Ai në një postim në Facebook ka kërkuar edhe dorëheqjen e qeverisë dhe mbajtjen e zgjedhjeve të jashtëzakonshme.
Asosacioni i komunave serbe në Kosovë me President, zv. President, me Kuvend, Këshill, Stemë dhe Flamur për serbët në Kosovë i pranuar nga qeveria është mjerim politikë i politikës në Kosovë. Kjo do të thotë ndarje e Kosovës në dy etnitete serbe dhe të komuniteteve tjera Shqiptare, Turke, Boshnjake, Ashkali, Egjiptase, Rome, Malazeze, Bugare etj. Dhe ndërrim i sistemit juridik në Kosovë dhe shkelje e Kushtetutës së Kosovës.
Prandaj kuvendarët nuk duhet ta votojnë.
Qytetarët shumicë nuk duhet ta pranojnë këtë asosacion të komunave serbe.
Qeveria duhet të jap dorëheqje.
Zgjedhje të jashtëzakonshme duhet të shkohet.
Mjerim për gjakun e derdhur për çlirim. Këtë gjendje edhe nën Serbie kem pas nën Millosheviqin. Për çka luftuam për me nda Kosovën. Ishalla Zoti na shpëton. Për gjykatën speciale thonin dhe miqtë tanë se fiton Kosova. Tash me asosacion çka po fiton Kosova vetëm mjerim dhe humbje të identitetit të vet.
Ky asosacion nuk duhet te pranohet, ka shkruar deputeti Hasani.
I zëshëm ka qenë edhe deputeti i Lëvizjes Vetëvendosje, Fisnik Ismajli përmes një shënimi të postuar në Facebook, ka kërkuar nga qytetarët që të dalin kundër marrëveshjes për krijimin e Asociacionit të Komunave Serbe. Ai thotë se tash është momenti i fundit, që qytetarët ta ngrenë zërin e tyre.
Në fund ka reaguar edhe analisti Lumir Abdixhiku, i cili thotë se Asociacioni i Komunave serbe ka të gjitha elementet e një entiteti autonom.
Ai në një postim në Facebook, ka shkruar se Asociacioni kalon Pakon e Ahtisaarit.
Sipas tij, Asociacioni ka qëllime të varësisë së saj, të pengimit të saj, të refuzimit të saj dhe se, siç thotë ai, Republika nuk i ka afruar refuzuesit e saj, ajo veçse i ka fuqizuar ata.
“Me kompetenca të plota e të pavarura në ekonomi, shëndetësi, edukim, dogana, polici, gjyqësor, buxhet e territor – me shërbyes civil e aspak joqeveritarë, me Kuvend, Kryetar e identitet të veçantë – Asociacioni ka të gjitha elemente e një entiteti autonom. Asociacioni pra, është, në versionin më të thjeshtë, një model i autonomisë së gjerë në Kosovë. Së paku është modeluar për të funksionuar si i tillë; dhe kështu ai, padyshim, kalon Pakon e Ahtisaarit. Përputhja me ligjet e Kosovës, sado lajm i mirë, nuk e zbutë shumë këtë fakt. Është përmbajtja dhe qëllimi çfarë ka rëndësi.
E sikur Asociacioni të kishte qëllime të pro-Republikës e pro-pavarësisë, atëherë ndoshta dhe do të bënte kuptim. Por nuk ka. Ka qëllime të varësisë së saj, të pengimit të saj, të refuzimit të saj – prandaj dhe bën një lajm jo të mirë për vendin. Me Asociacion, Republika nuk i ka afruar refuzuesit e saj, ajo veçse i ka fuqizuar ata”, ka shkruar Abdixhiku./tesheshi.com/
