Zgjedhjet e reja në Univeristetin e Prishtinës që rezultuan me riemërimin e njerëzve të lidhur me politikën në Këshillin Drejtues, përfundimisht detyruan Ramadan Zejnullahun që të dorhiqet nga pozita e rektorit.
Ideja e reformës dhe proresit që prezantoi Zejnullahu që në ditët e para të emërimit në këtë pozitë, alarmoi dhe shqetësoi tej mase disa grupe brenda fakulteteve të cilat organizuan në vazhdimësi protesta kundër Zejnullahut me pretekstin se po bllokon punën në UP.
Në muajin tetor të vitit 2015-të, Këshilli Drejtues i UP-së e shkarkoi Zejnullahun dhe kjo ngjalli reagime të shumta si nga shoqëria civile por edhe nga institucionet e vendit.
Reagimi i fuqishëm bëri që qeveria të merr vendim për rikthimin e tij në pozitën e rektorit. Ai u rikthye me qëllim të vazhdoj reformën e nisur por fatkeqësisht katër muaj më vonë u “mposht” nga zaptuesit e UP-së, por padyshim se është dhe mbetet fitimitari më i madh në sytë e qytetarëve.
Njohës të arsimit dhe shoqëria civile kanë reaguar menjëherë pas lajmit se Zejnullahu dorëhiqet nga pozita e rektorit, duke e cilësuar si fitore të kasapëve të Universitetit.
Ata thonë se Zejnullahu gjatë kohës sa ka drejtuar UP-në ka treguar se si duhet të udhëhiqet ky institucion, si punohet me nder dhe duke respektuar kriteret akademike.
Eksperti i njohur i arsimit, Dukagjin Pupovci, thotë se ndoshta Zejnullahu ka ardhur para kohe në krye të Universitetit, por institucionit të dijes do t‘i duhet përsëri një rektor si ai.
“Ndonjëherë duhet të qëndrosh për t’i dhënë njerëzve shpresë se do të bëhet më mirë, e ndonjëherë të largohesh për të mos u dhënë shpresë të rreme se do të bëhet më mirë. UP e ka bërë zgjedhjen e vet dhe në këtë skemë nuk ka vend për Ramadan Zejnullahun në krye të institucionit, as edhe për një periudhë kalimtare. Gjatë 18 muajve të mandatit të tij, Ramadan Zejnullahu na ka dhënë një mundësi të reflektojmë, të bindemi se gjërat mund të bëhen edhe ndryshe, se mund të punohet me nder, duke respektuar rregullat dhe kriteret akademike. Nuk e ka pasur lehtë në përballje me klane të udhëhequra nga kuazi-akademikët dhe me klientelën e tyre, por presionet nuk e kanë bërë të divergjojë nga qëndrimi parimor që ka mbajtur gjithnjë”, ka thënë Pupovci.
Profesori, Lumir Abdixhiku,e ka quajtur fitore të kapësve të Universitetit, dorëheqjen e Zejnullahut.
Ai thotëse humbja e betejës së Rektorit është humbje e përpjekjeve të shumë individëve, heronj modern të Republikës, të cilët në momentet më të rëndësishme mbesin megjithatë vet.
“Këta nuk kanë as militantë, as librezë partie as rrahagjoksë në krah – prandaj dhe largohen lehtë. Rektori njëtrajtësisht mbeti vet. Nganjëherë them se s’meritojmë më mirë”.
“Kur s’bën gjë të thonë pse s’bën;Kur bën të lënë vet;Kur mbetesh vet të harrojnë krejt.
Rizgjedhja e kapësve në UP prodhoj të pashmangshmen – dorëheqjen dhe largimin e Rektorit Zejnullahu nga aty. Çkapja s’bëhet; kapësit triumfuan; fabrika e paditurisë vazhdon punën. T’i gëzohen pavlefshmërisë gjithë ata studentë që lejuan kjo të ndodhte. E paçi vetën në qafë se ato copa letre që i thirrni diplomë s’kanë për të bërë punë për asgjë kur analfabetët ju mësojnë”, ka shkruar Abdxhiku në Faebook.
Agron Demi, nga Instituti GAP, thotë se pas largimit të Zejnullahut nga UP, ky institucion nuk edukon por formëson politikan.
“Hashim Thaçi deklaroi se “UP është vendi ku ai u formësua politikisht.
Edhe tash, ky institucion nuk edukon, por formëson politikan, të cilët vazhdojnë me na e deformu shtetin. Pikërisht për këtë fakt, aty lulëzojnë politikan si Bujar Dugolli, Ethem Çeku, Beqir Sadiku, Ibrahim Gashi e plot të tjerë.
Tash iu ka hap rruga edhe një politikani tjetër me u ba rektor i UP”, thotë Demi.
Përgatiti: Blendi Gashi – /tesheshi.com/
