Zëdhënësi i Ministrisë së Jashtme ruse Maria Zakharov u tha politikanëve të huaj që kritikojnë arrestimin e udhëheqësit rus të opozitës Alexei Navalny të respektojnë ligjin ndërkombëtar dhe ligjin rus, si dhe “të shohin problemet e tyre”.
Kjo erdhi pasi Jake Sullivan, të cilin Presidenti i sapozgjedhur i SHBA Joe Biden synon ta emërojë si ndihmës të sigurisë kombëtare, bëri thirrje për lirimin e menjëhershëm të Navalny-t, i cili u arrestua mbrëmë në aeroportin e Moskës.
“Sa i përket Sullivan dhe zyrtarëve të tjerë të huaj që shpërndajnë komente të parapërgatitura: respektoni ligjin ndërkombëtar, mos shkelni legjislacionin kombëtar të një shteti sovran dhe merruni me problemet në vendin tuaj,” shkroi Zaharova në Facebook.
Sullivan tha më herët se Rusia duhet të lirojë Navalny-n menjëherë.
“Navalny duhet të lirohet menjëherë dhe autorët e sulmit të paparë ndaj tij duhet të sillen para drejtësisë,” tha Sullivan në një postim në Twitter.
Ai shtoi se “sulmi i Kremlinit ndaj jetës së Navalny-it nuk është vetëm shkelje e të drejtave të njeriut, por edhe një fyerje për të gjithë rusët që do të donin që zëri i tyre të dëgjohej”.
Edhe Sekretari i Shtetit i SHBA Mike Pompeo përcolli një deklaratë me shkrim në të cilën ai kritikoi Moskën.
“Shtetet e Bashkuara dënojnë me forcë ndalimin nga Rusia të Alexei Navalny-t. Ne kërkojmë lirimin e tij të menjëhershëm dhe të pakushtëzuar”, tha Pompeo, duke theksuar se gjatë procesit zgjedhor, hapësira duhet të hapet për të gjitha partitë politike dhe kandidatët në Rusi.
Zyrtarë të tjerë botërorë gjithashtu reaguan ndaj lajmit të arrestimit të Navalny-t, duke përfshirë Presidentin e Këshillit Evropian Charles Michel, i cili vlerësoi se arrestimi i kryeopozitarit rus ishte i papranueshëm dhe u bëri thirrje autoriteteve ruse ta lirojnë atë.
Thirrja për lirimin e Navalny-it u lëshua gjithashtu nga Ministria franceze e Punëve të Jashtme.
Ndërsa ministri i Jashtëm gjerman Heiko Maas tha se Navalny duhet të lirohet menjëherë nga paraburgimi.
“Rusia është e detyruar të respektojë Kushtetutën e saj, por edhe të drejtën ndërkombëtare. Të drejtat e njeriut duhet të mbrohen. Këto parime duhet të zbatohen edhe për Navalny-n,” tha Maas.
Navalny u arrestua mbrëmë pasi zbarkoi në Moskë nga Gjermania, ku ai ishte duke marrë trajtim për helmim që nga gushti i vitit të kaluar, pas të cilit, sipas vendeve perëndimore, qëndron Kremlini. /tesheshi.com/
