Në një stinë të pazakontë mosmarrëveshjesh, ku për herë të parë në politikën shqiptare, prej një viti janë tre opozita përballë një mazhorance – jashtëparlamentare, brendaparlamentare, plus president – u nënshkrua një marrëveshje e radhës, ajo mes mazhorancës dhe brendaparlamentarëve, e cila garanton votat për marrëveshjen e 5 qershorit mes mazhorancës dhe jashtëparlamentarëve. Por këta të fundit e kundërshtuan ashpër, pasi në gjykimin e tyre, marrëveshja e kësaj të marte të 21 qershorit, zhbën atë të 5 qershorit.
“Akti i sotëm është dëshmi e planit diabolik të Edi Ramës që të miratojë fillimisht për fasadë Marrëveshjen e 5 Qershorit, të vërë në lojë partnerët tanë strategjikë, SHBA dhe BE dhe vetëm 1 javë më vonë ta zhbëjë marrëveshjen me ndryshime të njëanshme kushtetuese, që ndalojnë koalicionet si subjekt zgjedhor”, than ë një deklaratë Opozita e Bashkuar (jashtëparlamentarët).
Nga ana tjetër, Rama ftoi Bashën që mos u shmanget tryezave dhe dialogut.
“I bëj thirrje Bashës që të mos bëjë gabimet e së shkuarës por të vazhdojmë punën së bashku. Kemi shumë mundësi që të biem dakord. PD është realitet demokratik nuk mund të bëjmë sikur nuk ekziston. Jemi në rrugë shumë të mbarë. Edhe unë kam pasur momentet e mia të vështira, humbjet e mia, por kjo është politika. Kush i merr shqiptarët për budallenj, e ha”, tha Rama.
Nga ana tjetër, edhe jashtëparlamentarët kanë patur mosmarrëveshjet e tyre brenda marrëveshjes me mazhorancën. Ndërsa deputetja Hajdari e përshëndeti, Murrizi e Gjoni u shfaqën ndryshe.
“U përfaqësua denjësisht, mori formë dhe u nënshkrua nga 4 deputetët e grupeve parlamentare. Jam shumë e kënaqur. Një hap përpara për demokracinë shqiptare”, tha znj.Hajdari.
“Kemi firmosur për listat e hapura dhe ndryshimet kushtetuese. Myslim Murrizi ka firmosur që është kundër pikës 1 të kësaj marrëveshje dhe nuk do të votojë marrëveshje”, tha Murrizi.
“Votimi është individual. Ka pasur një dakordësi me mazhorancën për hapjen e listave që kërkon ndryshime kushtetuese. Vota për marrëveshjen në parlament do të jetë unanaime, unë votoj hapjen e listave. Kam qenë kundër 5 qershorit. Nuk kam ndryshuar. Nuk votoj marrëveshjen e 5 qershorit por hapjen e listave”, tha deputeti Ralf Gjoni.
“Ky proces ishte pjesë e një rrugëtimi të gjatë ku para një viti i propozuam listat e hapura. Sot kemi konsensusin për të votuar 5 qershorin në 23 korrik dhe hapjen e listave në 30 korrik. Murrizi është një tjetër grup parlamentar dhe secili kryetar mban përgjegjësi për grupin e vet. Nuk është çudi që të ketë deputetë që votojnë kundër por besoj se do merren 84 votat për 23 korrik ku do votohet 5 qershori”, tha deputeti Stojku. /tesheshi.com/
