Pas Knut Flackenstein vjen dhe reagimi i dytë ndërkombëtar ndaj protestës së opozitës në Tiranë. Është zëdhënësja e Brukselit, Maja Koçijançiç, ajo që ka deklaruar gjatë një prononcimi për RTSH-në se debati politik duhet të zhvillohet brenda parlamentit dhe jo jashtë tij.
“Për këtë arsye, është e rëndësishme të tregohet vazhdimësia e parlamentit në një moment kyç, kur diskutohen e miratohen ndryshimet, në veçanti ato që lidhen me reformën e Drejtësisë”, ka theksuar Koçijançiç.
Po ashtu, njeriu që përcjellë zërin zyrtar të BE-së ka komentuar dhe kontestimet mbi bordin e Operacionit Ndërkombëtar të Monitorimit – instancën e huaj pra që do jetë roje mbi procesin e vettingut – ardhur nga eksponentë të LSI-së.
“Komisioneri Hahn ka marrë disa letra në të vërtetë dhe u është përgjigjur atyre. Siç e dini ngritja e bordit për Operacionin Ndërkombëtar të Monitorimit është diçka e diskutuar thellësisht në detaje me qeverinë shqiptare. Është dhënë shumë informacion mbi këtë dhe është ngritur në përputhje me legjislacionin përkatës dhe Kushtetutën e Shqipërisë dhe detyra e bordit është për të monitoruar procesin. Pra, është tejet e qartë dhe transparente”, i ka vënë vulën zëdhënësja e Brukselit. /tesheshi.com/
