Për çdokënd që e ka njohur nga afër ish-gazetaren Suela Musta, ku veçojmë ne pra, kolegë të saj, syshqyerja jonë përballë emrit të saj në komunikatën e Policisë si e arrestuar, ishte e paevitueshme.
Sepse, një pikëtakim mes Suelës dhe Policisë në kuptimin penal të çështjes, është gati me propabilitet zero.
Siç është komunikuar pra, Suela Musta, si një prej anëtareve të AMA-s, është arrestuar në kuadër të një operacioni kundër Çapjave famëkëqinj të Elbasanit, sepse, siç përflitet, ka abuzuar me detyrën në dhënien e një liçence kabllori ndj tyre. Me të, është arrestuar dhe Andrea Nathanaili, një prej zyrtarëve në vite të AMA-s me cilësinë e një eksperti.
Nuk mund t’i hyjmë qasjes policore për të përcaktuar detajisht nëse jo Nathanalili por Musta, ka bërë shkelje ligjore deri në masën sa t’i vihen prangat.
Dihet që ajo, si një prej anëtarëve te AMA-s, nuk mund të ketë vendimarrje më vlerë nominale. Megjithatë, “dora në zjarr” nuk mund të vihet gjersa pa e thënë drejtësia fjalën e saj.
Por ne si kolegë të saj, na takon të theksojmë faktin se Suela Musta, si formim, edukatë, korrektësi dhe skrupulozitet, të gjitha këto brenda një botë thjeshtësie e modestie, nuk i takon kurrsesi të jetë pas hekurave.
Gjuha e ligjit, edhe nëse është e ftohtë, në asnjë rast nuk injoron kontekste sociale dhe individuale ndaj një individi që për një çast mund ta ketë shkelur atë.
E jo vetëm nga fakti se Suela Musta, është bija e një prej dokumentuesve të krimeve të diktaturës pas ’90-ës, Agim Mustës. Një ish-i burgosur politik, i cili është një prej themeluesve e kontribuesve në memuaristikën kushtuar burgjeve komuniste. E tani, si për një fat cinik, edhe e bija përfundon në burg. Dhe është fjala për një person, që vërtet, siç është përfolur këto orë edhe nga të tjerë kolegë të saj, jetonte me një thjeshtësi prekesë.
Eshtë e rëndë, tejet e rëndë, sado që mund t’i jetë konstatuar ndonjë shkelje ligjore, ta fusësh atë në thesin e Çapjave e t’i vësh prangat në kuadër të një operacioni anti-krim.
Eshtë e gati e pabesueshme, e pagëlltitshme, shokuese…Eshtë detyra e çdo kolegu gazetar që punoi dhe u shoqërua sadopak me Suelën, për t’ja kumtuar këtë asaj pjese të opinionit që nuk e njeh, e që padashje mund ta vizitojë si një Çapje.
Janë dy botë pa asnjë pikëlidhje! /tesheshi.com/
