Miratimi nga Izraeli i ndërtimit të një ngulimi të ri në Bregun Perëndimor, i pari në dy dekada, ka sjellë një varg reagimesh.
Sekretari i përgjithshëm i OKB-së, Antonio Guterres, është raportuar të jetë i zhgënjyer dhe i alarmuar nga një vendim i tillë.
“Ai i dënon të gjitha veprimet e njëanshme, që, si ky i tanishmi, kërcënojnë paqen dhe minojnë zgjidhjen me dy shtete,” deklaroi zëdhënësi i OKB-së, Stephane Dujarric.
Ambasadori i Suedisë në OKB, Olof Skoog, ka kërkuar reagim të institucionit ndaj situatës, duke pranuar se njëzëshmëria është e vështirë të arrihet.
“Urgjenca e situatës dhe përkeqësimi në terren mund të kërkojnë një lloj veprimi të Këshillit të Sigurimit, ndonëse e dimë se gjetja e unitetit nuk është e lehtë.”
Nuk mbeti prapa as Ministria e Jashtme franceze, e cila po ashtu shprehu pakënaqësinë për vendimin izraelit.
“Franca kujton se kolonizimi është i paligjshëm sipas ligjit ndërkombëtar,” thuhej në një deklaratë të këtij dikasteri.
Ministri i Jashtëm britanik, Boris Johnson, deklaroi se ndërtimi i ngulimeve dhe shpronësimi i tokës palestineze shkel ligjin ndërkombëtar dhe minon perspektivën e një zgjidhjeje me dy shtete të konfliktit izraelito-palestinez.
Një rezolutë e miratuar nga Këshilli i Sigurimit i OKB-së në dhjetorin e 2016-s i kërkonte Izraelit të ndalonte ndërtimin e vendbanimeve të reja në territoret palestineze. /tesheshi.com/
