Komisioni Evropian ka konfirmuar se nga data 19 deri më 21 mars do të mbahet raundi i ri i bisedimeve Kosovë-Serbi, ku ndër temat kryesore do jetë themelimi i Asociacionit të Komunave me shumicë serbe, apo siç njihet ndryshe edhe “Zajednica”.
“Marrëveshja për themelimin e Asociacionit të Komunave me Shumicë Serbe duhet të funksionalizohet sa më parë. Prej fillimit ne kemi qenë të qartë për të dyja palët që Asociacioni i Komunave Serbe duhet të gjejë aplikim pa vonesë. Kjo vlen edhe për të gjitha marrëveshjet e tjera që nuk janë zbatuar plotësisht, siç është ajo për energjinë”, ka deklaruar zëdhënësja e Komisionit Evropain Maja Kocijançiç.
Ajo më tej ka bërë të ditur se tema tjera që do të diskutohen janë edhe ajo për energjinë, urën në Mitrovicë, lirinë e lëvizjes dhe menaxhimin e integruar të kufirit.
Kujtojmë se kryenegociatorët nga Beogradi dhe Prishtina, Marko Gjuriç dhe Avni Arifi, u takuan së bashku me ekipet e tyre përkatëse në Bruksel më 26 dhe 27 shkurt për diskutime mbi zbatimin e marrëveshjeve të ndryshme të arritura ndërmjet dy palëve në dialogun e lehtësuar nga BE-ja. /tesheshi.com/
