Rezultatet e ditës së sotme në zgjedhjet rajonale në Francë po priten me interes, e njëkohësisht me ankth, në tërë Europën.
Kryesimi i Frontit Nacional të Marine Le Pen-it në raundin e parë ka sjellë trazim në Francë e më gjerë, për shkak të qasjes të gjithhershme e të gjithmbarshme ekstremiste të kësaj partie të së djathtës, e cila arriti që situatën aktuale ta përkthejë më së mirë në shumicë votash.
Fronti Nacional kryesoi në raundin e parë të zgjedhjeve rajonale, me 28 për qind të votave të siguruara, duke lënë pas republikanët e aleatët e tyre, me 27 për qind.
Vlen të përmendet tërheqja e kandidatëve të socialistëve të presidentit Hollande në zonat ku kandidojnë Le Pen-i dhe mbesa e saj dhe thirrja për të mbështetur kandidatët e opozitës, të konservatorëve të ish-presidentit Sarkozy. Lëvizja e socialistëve synon t’i japë një avantazh opozitës për të shmangur fitoren e Frontit Nacional.
Ende është e paqartë nëse Fronti Nacional do ta ruajë epërsinë e javës së shkuar, ashtu siç nuk dihet akoma nëse do të jetë në gjendje të dalë fitues për herë të parë në një rajon.
Analistët zgjedhorë janë të mendimit se të udhëhequrit nga Marine Le Pen-i mund të fitojnë nga një deri në pesë prej 13 rajoneve të Francës. Fitorja e mundshme e Frontit Nacional shihet si një kërcënim për stabilitetin e Francës e të Europës. /tesheshi.com/
