Udhëheqësi kubanez, vëllai i Fidel Kastros, revolucionarit që i solli komunistët në pushtet në Kubë, bëri dje një vizitë në Selinë e Shenjtë, gjatë së cilës pati një takim me Papa Françeskun, të cilit i shprehu falënderimet për ndërmjetësimin në uljen e tensioneve me SHBA-të.
Papa e priti Raul Kastron duke i uruar në spanjisht mirëseardhjen, “Bienvenido!” Takimi u zhvillua në studion e Papës, pranë sallës së pritjes publike. Biseda qe kokë më kokë dhe zgjati rreth një orë.
I larguar nga Vatikani me përshtypjet më të mira, udhëheqësi kubanez u shpreh në një konferencë shtypi në zyrën e kryeministrit italian, Matteo Renzi, me të cilin u takua më pas, “Kur Papa të vijë në Kubë në shtator, premtoj të shkoj me kënaqësi në të tëra meshat e tij.”
“Unë i lexoj të gjitha fjalimet e Papës, komentet e tij, dhe nëse ai vazhdon kështu, unë do t’i kthehem lutjes dhe kishës, e nuk po bëj shaka,” shkoi më tej Raul Kastro, në një pohim të papritur.
Vatikani pati qenë gjithmonë i ashpër në kritikat ndaj regjimit komunist ndërsa ky i fundit i shtypte kundërshtarët në të shkuarën.
“Unë jam nga Partia Komuniste Kubane, që nuk i lejon besimtarët, por tani po i lejojmë; ky është një hap i rëndësishëm,” pohoi Kastro.
Papa ishte falënderuar dhe më herët nga Kastro për ndihmën e dhënë në shkrirjen e akujve mes Kubës dhe SHBA-ve, dhe pritet ta vizitojë në shtator vendin e Karaibeve.
Vatikanin e pati vizituar në vitin 1996 Fidel Kastro, i cili qe takuar me Papa Gjon Palin II. Ai takim hapi rrugën për vizitën e Papës dy vite më vonë në Kubë, e para nga një papë në ishull. /tesheshi.com/
