Bamir Topi është bërë i gjallë pas dokumenteve të publikuara rreth deputetit Flamur Noka, sipas së cilave, ai ka rënë në duart e UDB-së këtu e 20 e kusur vite më parë, duke iu bërë dhe një ofertë për të qenë bashkëpunëtor. Rastin e Nokës, Topi e lidh me një zhvillim të pak viteve më parë kur ai ishte president. Topi aludon se Berisha, qëllimisht ka amenduar draftin e ligjit mbi dosjet, duke marrë në konsideratë faktin se Noka është bashkëpunëtor i UDB-së
“Mbi bazën e disa të dhënave që s’janë të miat por janë të ekspozuara, ish-ministri i Brendshëm ka një suspekt të fortë që duhet t’i sqarojë, për lidhjet me Shërbimin Sekret Jugosllav. Me shërbimin informativ serb. I takon atij t’i sqarojë. Dhe po i kthehem një pyetje që e kam bërë në momentin kur isha President. Ka qenë një qëndrim konstant nga ana ime për hapjen e dosjeve të Sigurimit të Shtetit.
Pse ndryshoi drafti i vitit 2006-të? Ai draft kishte dy autorë, personin tim dhe zotin Majko. Dhe në vitin 2008-ë, erdhi në një formë tjetër. Dhe pyetja ka qenë e drejtpërdrejtë për ish-kryeministrin: Pse brenda draftit ligjor, zotëri, nuk e fut kategorinë e bashkëpunëtorëve të agjenturave të huaja? Përgjigjen s’e mora asnjëherë. E di ai...”, tha Topi, duke e trajtuar këtë zhvillim të fundit në skenën politike gjatë Asamblesë së FRD-së. /tesheshi.com/
