Pas pastrimit të parlamentit nga kriminelët, ndryshe ish-të inkriminuarit, tashmë debati është përqëndruar tek ish-komunistët. Kjo falë përzgjedhjes së Gramoz Ruçit si kryetar Kuvendi, nga ana e mazhorancës. PD, edhe pse e ka njohur ndër vite Ruçin si politikan normal, gjersa është ulur me të në tryezë bisedimesh, tashmë, pas 27 vitesh e sheh atë si komunist që i bën karshillëk demokracisë.
Por ai, edhe pse ka qëlluar të jetë një ish-ministër në kohë të trazuara, fundin e regjimit në 90-tën, nuk është hiç më pak relike ish-sistemi sesa ndoca të tjerë si ai, të cilët gjenden dhe në kahjen anti-komuniste në dukje, PD-në, ku më kryesori mbetet Sali Berisha, dora vetë, një ish-funksionar po ashtu në nivele me të ulëta, dhe padyshim anëtar i PP-së për më shumë se dy dekada.
Pasdite pritet që të zhvillohet një protestë e ish-të përndjekurve politikë për zgjedhjen e Gramoz Ruçit si kryetar Kuvendi, por nëse do të ndiqnin të njëjtin standart moral, ata që dje duhej të reagonin ngjashëm dhe ndaj Berishës, duke mos pranuar që një ish-komunsit të udhëheqë PD-në, e madje Shqipërinë në kohë demokratike, si President e më pas si Kryeministër.
Gjithashtu protesta do të zhvillohet edhe ndaj Fatmir Xhafës, kandidat për ministër të Brendshëm, i cili ka punuar gjatë kohës përpara vitit 1990 si hetues në rrethin e Krujës.
Por ja që ish-komunistët në parlamentin shqiptar nuk janë vetëm Ruçi dhe Xhafaj, ku përfshihet gjithnjë ai,
Sali Berisha. Të tjerë mund të renditen: Ish-zv.kryeministri Tritan Shehu; ish-ministri i Financave Ridvan Bode, njëherësh një aktivist në mbrojtje të figurës së Enverit; ish-ministri nga LSI-ja, Edmond Panariti; ish-ministri tjetër i LSI-së, Nasip Naço; ish-zv.ministrja e LSI-së, Nora Malaj; ish-ministri i PS-së, Ilir Beqaj; ish-kryetari i bashkisë Berat, Fadil Nasufi, i cili ka qenë edhe deputet në vitin 1991.
Anëtar i PPSH-së ka qenë edhe Musa Ulqini, ish-gazetar i Zërit të Popullit në fund të viteve ‘80 të shekullit të shkuar, si dhe drejtuesi i seancës së sotme, Besnik Baraj, deputet i PS-së.
Këto janë vetëm disa emra, që në mënyrë simbolike tregojnë se ish-komunistët janë aty, pa dallim partie. Vetë PD hapi krahët për ta në fillimet e saj, dhe, kriza e rëndë morale që ajo po përjeton sot, është ndër të tjera dhe pasojë e politikave më dy standarte që ka ndjekur që nga ekzistenca, falë kreut të saj…ish-komunist! /tesheshi.com/
