I zhveshur nga çdo pushtet prej kryeministrit Rama, ish-ministri i Jashtëm Ditmir Bushati, deputet i Shkodrës, ka gjetur rastin që të përcjellë kritika ndaj lidershipit të PS, duke marrë shkas nga rasti me Valdrin Pjetrin. Pas një mbledhje kryesie ku Shkodra ishte temë kryesore debati në kupolën e lartë të selisë rozë, Bushati e çoi llafin te të gjithë ata individë me probleme me të kaluarën e tyre, të cilët i ndoqi dhe i përzgjedhuri Pjetri për qytetin verior.
“Ato gabime që kemi bërë në të shkuarën kur njerëz të cilët kishin një të kaluar të dyshimtë i përjashtuam nga radhët tona, u përshëndetëm publikisht nga SHBA, fatkeqësisht u rikthyen në tryezat tona vendim-marrëse, dhe sot na duhet që të administrojmë pasojat e këtyre gabimeve”, tha Bushati.
Ai gjithashtu doli kundër idesë së Ramës për të shkarkuar drejtorët në Shkodër.
“Pas 30 viteve PS ka mundësinë t’i ofrojë vendit njerëzit më të mirë. Kjo nuk mund të bëhet duke shkarkuar në masë njerëzit që nuk kanë asnjë lidhje me situatën e krijuar. Ne nuk jemi as prokurorë as gjyqtarë. Ne kemi përgjegjësinë për trajtuar këtë fenomen. Rrënjët e tij kanë nevojë për një reformë politike që të sjellë një sistem të ri llogaridhënës.
Në rast se përgjegjësia për të kaluarën e secilit është individuale ne na takon të marrin masa dhe të krijojmë sistemi imunitare. Jam krejt i bindur nga kontaktet që kam pasur se ne kemi përgjegjësinë e madhe për ta trajtuar këtë fenomen. PS është partia e intelektit. Ato gabime qe kemi bërë, i kemi përjashtuar nga radhët tona”, tha Bushati”, theksoi deputeti shkodran. /tesheshi.com/
