Nga Blendi Gashi
Një deklaratë e bërë ditë më parë nga kryeministri Isa Mustafa lidhur me shkarkimin e Ljubomir Mariçit nga pozita e ministrit të Administrimit dhe Pushtetit Lokal, se “e kam duruar shumë gjatë shkaku se është serb sepse, po të ishte shqiptar do të shkarkohej që moti…”, ka vënë në pah tolerimet që bëhen për ministrat serbë, edhe pse ata ditë e natë punojnë kundër interesave të shtetit.
Përmes kësaj deklarate Mustafa e ka pranuar pafuqinë e tij ndaj tyre dhe njëherit ka “kërcënuar” ata shqiptarë, konkretisht ministrat e partisë së tij se mund t’i largojë në çdo moment nëse i dalin kundër.
Kjo praktikë e kreu të ekzekutivit, pra mostrajtimi i barabartë i të gjithë anëtarëve të kabinetit qeverisës, ka ngjallur reagime jo të pakta.
“Deklarata e Mustafës, diskriminuese”
Këshillimi për Mbrojtjen e të Drejtave dhe Lirive të Njeriut (KMDLNj), thotë se e përkrahin shkarkimin e Mariçit, por deklaratën e Mustafës e konsideron diskriminuese dhe kërkon që vlerësimi i punës së ministrave të bëhet në bazë të rezultateve e jo në bazë të përkatësisë etnike sikur që edhe ndërmarrja e masave eventuale të bëhet në bazë të këtyre kritereve.
Ky këshill më tej shprehet se integrimi i serbëve të Kosovës nuk mund të bëhet me kushtëzime politike që janë kundër interesave të Kosovës.
“Praktika e diskriminimit pozitiv (vetëm për serbët) duhet të ndërpritet dhe të gjithë duhet të trajtohen në përputhje me ligjet e Kosovës si dhe me konventat ndërkombëtare për të drejtat e pakicave dhe komuniteteve jo-shumicë. Kosova nuk ka nevojë të ‘zbulojë’ të drejta të pakicave (serbe) por vetëm duhet t’i zbatojë ato ekzistuese, as më shumë e as më pak! Ndryshe, përveç legalizimit të diskriminimit, do të krijonte precedente negative që do të prodhonin pasoja shkatërrimtare për Kosovën ku të drejtat e njeriut, si standard dhe demokracia si synim, do ta humbin kuptimin”, thuhet në reagimin e KMDLNJ-së.
“Mustafa duron gjithçka për të mbetur kryeministër”
Ndaj deklaratës së Mustafës ka reaguar edhe sekretari i Vetëvendosje-s, Dardan Molliqaj, i cili tha, dhe jo pa ironi, se Mustafa gjatë qeverisjes së tij duroi shumë, duke përmendur emërimin e Thaçit president, dhënien e tenderëve, ndërtimin e murit në veri etj., me qëllimin e vetëm të mbetet në pozitën e kryeministrit.
“Por durimi i tij është bërë i padurueshëm. Viti 2017 do të jetë vit i padurimit qytetar me durimin rrënues të Isa Mustafës”, ka thënë Molliqaj.
Ndaj kësaj deklarate ka reaguar LDK-ja që e ka quajtur Molliqajn “kriminel ordiner”. /tesheshi.com/
