Pronari i AbcNews, Aleksandër Frangaj, ka shkarkuar drejtorin Armand Shkullaku dhe drejtori i MediaMapo Alfred Lela ka dhënë dorëheqjen pas divergjencave për linjën editoriale me botuesin Henri Çili. Kreu i opozitës Lulzim Basha e quan “ditë e zezë për median, lirinë dhe demokracinë”
Në prag të fushatave zgjedhore ata që ndjejnë më shumë presionin janë gazetarët dhe ata që ndjejnë më shpejt erën e pushtetit dhe përfitimeve janë pronarët e mediave. Me gjasë ka gjithmonë disa “koka të prera” dhe disa lëvizje të rëndësishme për të krijuar terrenin e përshtatshëm për të mbështetur qeverinë apo opozitën.
Zgjedhjet e 18 qershorit sapo dhanë shenjat e para të pozicionimit të mediave politikisht.
Armand Shkullaku dhe Alfred Lela, dy gazetarë dhe analistë politike, zyrtarisht që nga dita e djeshme janë të papunë. Shkak për largimin e tyre nga mediat ku punonin si drejtorëështë bërë afrimi i zgjedhjeve të reja parlamentare dhe fakti që ata nuk i përshtateshin linjës editoriale pro-qeveritare të pronarëve të mediave të tyre.
Shkullaku u shkarkua nga drejtor i AbcNews nga pronari i këtij televizioni Aleksandër Frangaj, i cili e ka shprehur hapur tashmë qëndrimin e tij pro qeverisë “Rama”. Shkullaku duket se ishte një pengesë për t’a vënë këtë Tv në shërbim të fushatës zgjedhore të Ramës, edhe për shkak të bindjeve të djathta të tij.
Gjithashtu gazetari i Mapos, Alfred Lela, e ka pranuar afërsinë e tij me opozitën e djathtë dhe nuk ka pranuar linjën editoriale të vendosur nga botuesi Henri Çili në mbështetje të një mandati të dytë për Edi Ramën kryeministër, që përkthehet në mbështetje mediatike për fushatën e tij.
Lela dhe Shkullaku nuk janë shquar si gazetarë të pavarur, apo si mbrojtës të flaktë tëlirisë së gazetarisë në vend, ku cencusa dhe vetcensura ka arritur në shkallën më të lartë, por në këto ditë dimri ata u bënë “viktima” të lirisë së shprehjes.
Kryetari i opozitës, Lulzim Basha, e cilësoi largimin e tyre si “një lajm të keq për vendin, një hap më shumë drejt zaptimit të medias nga një regjim i korruptuar e kriminal”.
“Largimi i tyre, vetëm për t’i vënë këto media në shërbim të plotë ndaj qeverisë është lajm i keq për të gjithë.Është lajm i keq sepse kur politika, interesat e biznesit dhe media bëhen bashkë, ditë të vështira vijnë për një vend dhe popull. Kjo ditë ka ardhur për Shqipërinë. Ata janë bërë bashkë për të ruajtur pushtetin dhe paranë. E keqja është bërë bashkë, kundër qytetarëve”- shkruan Basha sot në facebook.
Lela: Nuk mund të shuaja qëndrimet e mia publike
Artikulli i fundit mbi të cilin ka vendosur emrin e tij, Alfred Lela, më median Mapo ka qenë artikulli “Lulzim Basha, njeriu i vitit” në kopertinën e revistës Mapo. Edhe pse ka qenë po firma e tij në një shkrim të ngjashëm tre vite më parë “Edi Rama, njeriu i vitit”, nuk e ka penguar Lelën që mos t’i bindet linjës së vendosur nga pronari i gazetës për t’i qëndruar në krah Ramës në këto zgjedhje.
Ja çfarë shkruan ai për largimin nga Mapo: “Botuesi Henri Cili më dha tre opsione, i treti i të cilëve ishte puna si pedagog i Komunikimit ne UET. Dy të tjerat parashikonin një linjë editoriale që përputhej me shpalljen e Henrit në një shkrim të para ca kohëve ‘një mandat të dytë për Ramën reformator’. Unë kam patur dhe kam kritikat e mia për opozitën e Bashës, por profesionalisht dhe as personalisht, nuk mund të shtyhesha drejt një qëndrimi të tillë, i cili shuante një pjesë të madhe të qëndrimeve të mia publike”.
Shkullaku: Pronarit Frangaj i duhej një qasje e re editoriale
“Vendimi për të lënë AbcNews nuk ishte një zgjedhje e imja. Pronari i grupit mediatik për të cilin unë punoj, gjykoi se në këtë periudhë televizionit i duhet një qasje e re, menaxhariale dhe editoriale, dhe kështu kontrata ime 4 vjeçare me AbcNews quhet e përfunduar këtu. Nuk do të kem një kontratë të re me këtë televizion”- u shpreh Armand Shkullaku pas largimit.
Shkullaku ka një përvojë 20-vjeçare në gazetari dhe ka ngritur dhe zyrën e TvKlan në Kosovë. Por duket se mënyra se si ai e drejtoi AbcNews duke e kthyer në një media tipike kritikuese të qeverisë e nxori atë jashtë zyrës së drejtorit, pasi pronari kishte bërë llogari të tjera para zgjedhjeve.
Shkullaku premton se “do të mbetem i angazhuar, me shkrime dhe opinione, për të thënë gjithnjë atë që mendoj dhe duke u përpjekur të mbetem i paluhatur në bindjet e mija profesionale”.
Largimi i dy gazetarëve nga puna për arsye politike është një këmbanë alarmi për situatën ku ndodhet liria e medias në Shqipëri dhe që ky rast është vetëm maja e ajsbergut e punës në të zezë, e vetcensurimit të përditshëm të qindra gazetarëve në redaksitë e gazetave dhe televizioneve, që drejtohen nga pronarë që kanë fije pafund interesi financiar me pushtetin. /tesheshi.com/
