Nga Blendi Gashi
Ndërsa vezët shumë vite më parë kanë qenë privilegj gastronomik dhe vetëm familjet e pasura kanë pasur luksin t’i kenë në tryezë, tashmë ato që një kohë të gjatë janë bërë pjesë edhe e politikës kosovare, sigurisht më shumë për t’i goditur kundërshtarët politikë se për t’i ngrënë.
Është Lëvizja Vetëvendosje, ajo e cila së pari ka futur në përdorim këtë “armatim” të lehtë ku vitet e fundit ka goditur kundërshtarët përmes aksioneve të ndryshme, sidomos gjatë qeverisë “Mustafa”, duke i skuqur herë në kokë, krahë apo rrobat e tyre.
Dhe sivjet, “veza e parë politike” është shigjetuar tek vetëvendosësit, ku është goditur deputeti Ismail Kurteshi, të hënën mbrëma derisa po dilte nga oborri i një shkolle në fshatin Caralevë të Shtimes. Atje, Kurteshi me anëtarë tjerë kishin shkuar për fushatë elektorale të lokaleve që do mbahen këtë të dielë.
Rrëfimi i Kurteshit dhe akuza ndaj policisë…
Kurteshi ka sqaruar ngjarjen, duke thënë se ai është sulmuar jo vetëm me vezë por edhe me gurë në errësirë, pasi në oborrin e shkollës ku nuk ka pasur drita.
“Pas përfundimit të tubimit në fshatin Caralevë, në oborr të shkollës kemi qenë, nuk ka pasur drita, ka qenë terr. Papritmas dikush ka gjuajt, por nuk e kemi pa kush, me vezë e pastaj edhe me gurë. Kjo ka ndodhë në prezencën e Policisë. Policët i kemi pas pothuajse 5 metra larg. Pas disa gjuajtjeve janë ndalë. Dy aktivistë kanë marrë lëndime të lehta, mua personalisht me është përlyer një pallto”, ka thënë ai për mediat kosovare.
Deputeti këtë sulm e ka quajtur politik dhe qyqar, i cili ishte kryer në mënyrë tinëzare. Megjithatë, ai ka thënë se nuk mund të thotë se kush e ka sulmuar meqë nuk ka arritur të shohë nga errësira.
Vetëvendosje del “kundër” vezëve…
Dhe ashtu siç pritej, Vetëvendosje e ka dënuar sulmin ndaj anëtarëve të saj, duke dalë kështu “kundër” vezëve.
A do t’i kap policia vezëgjuajtësit ndaj VV-së?
Vezët kundër tyre VV i sheh si panik të pushtetit, siç thotë për ndryshimet e mëdha që ndodhin pas lokaleve të 22 tetorit, ndërsa kërkon veprim nga policia.
“Lëvizja Vetëvendosje fton organet ligjzbatuese që të ndërmarrin urgjentisht veprime për zbulimin dhe dënimin e sulmuesve. Këto sulme që shpërfaqin panikun e pushtetit lidhur me fuqizimin e Lëvizjes Vetëvendosje në Komunën e Shtimes dhe kudo në Republikën e Kosovës nuk do të mund ta ndalin vullnetin popullor për ndryshimin e madh politik, të filluar më 11 qershor dhe që do të masivizohet edhe më shumë në rezultatin e zgjedhjeve të 22 tetorit”, thuhet në reagim.
Kujtojmë se pothuajse të gjithë aktivistët e VV-së që kanë gjuajtur me vezë qoftë anëtarë të PDK-së apo LDK-së janë kapur nga policia.
Mbetet të shihet nëse do kapen edhe vezëgjuajtësit që goditën vetëvendosësit, dhe kjo tashmë është kërkesë e partisë së Visar Ymerit për policinë.
Kujtojmë se disa nga politikanët që VV i ka gjuajtur me vezë janë: ish-zv.kryeministri Hajredin Kuçi, ish-ministria i Administrimit dhe Pushtetit Lokal Bajram Gecaj, ish-ministrin e Bujqësisë Memli Krasniqi e zyrtarë të tjerë. /tesheshi.com/
