Kreu demokrat Basha e ka konsideruar të dënueshëm faktin e një mosreagimi të Ramës pas nxjerrjes së një dokumenti nga PD, ku sipas saj tregon se Agim Kajmaku, kreu i ri i Bashkisë së Vorës, ka qenë i proceduar penalisht në Greqi me emër tjetër.
Sipas Bashës, as Arta Marku nuk duhej të heshtte.
“Dua të dënoj heshtjen e Edi Ramës, ka 24 orë që PD ka publikuar dokumentet zyrtare që provojnë se Kajmaku është në shkelje të dekriminalizimit dhe sot duhet të ishte marrë i pandehur nga prokuroria. Dua të dënoj heshtjen e prokurorisë që si shtojcë e Ramës, ka 24 orë që hesht. Pse hesht prokuroria? Pse hesht Arta Marku dhe veglat e saj?”, u shprej Basha.
Në fakt, ndryshe nga rasti me Valdrin Pjetrin, Rama nuk ka reaguar për Kajmakun. Vetë ky i fundit reagoi orë më vonë pas daljes së dokumentit në greqisht, ku u përbëtua se kurrë nuk është përfshirë në krim apo trafiqe në shtetin fqinj. /tesheshi.com/
