Ndërsa lajmi i vdekjes së ish-presidentit egjiptian Muhamed Mursi ka tërhequr vëmendje ndërkombëtare, ai nuk ka marrë vëmendje nga gazetat në Egjipt.
Ish presidenti 67-vjeçar, i cili u alivanos e më pas gjeti vdekjen në dyshemenë e gjykatores, ishte presidenti i parë demokratik i vendit.
Ai erdhi në detyrë në qershor 2012, një vit pasi kryengritja e Pranverës Arabe shënoi fundin e sundimit 30-vjeçar të Presidentit Hosni Mubarak.
Të martën, nuk kishte pothuajse asnjë mbulim në faqen e parë të vdekjes së Mursi në gazetat kryesore të Egjiptit. Në vend të kësaj, lajmi u raportua shkurtimisht në faqet e brendshme të cilat zakonisht i përkushtohen monitorimit të rasteve penale.
Raportet nuk përmendën statusin e Mursit si ish-president, e as si president i përmbysur.
Sipas gazetës në pronësi private Mada Masr, e vetmja gazetë e përditshme që ka shfaqur lajmet për vdekjen e Mursi në faqen e saj të parë ishte Al-Masry Al-Youm, ndërsa shumica e gazetave të tjera botuan të njëjtin artikull 42-fjalësh.
Të tre gazetat kryesore shtetërore e përshkruan ish-presidentin si “të akuzuarin” ose “të vdekurin”, e disa gazeta në pronësi private as nuk e raportuan lajmin.
Kjo u pasqyrua edhe në kanalet televizive satelitore egjiptiane, të cilat transmetonin lajmet me terma të paqarta dhe të papritura dhe i referoheshin organizatës së Vëllazërisë Myslimane, të cilës Mursi i takonte, si një grup “terrorist”.
Gazeta më e madhe shtetërore Al Ahram publikoi lajmin e vdekjes së Mursi në faqen së saj të katërt nën titullin: “Vdekja e Mohamed Mursi gjatë gjykimit të tij në rastin e spiunazhit”.
Mbulimi i gazetës Al Akhbarit ishte i ngjashëm dhe përfshiu një paragraf me titull: “Vdekja e Mohamed Mursi gjatë gjykimit të tij”.
Gazeta Al Gomhuria publikoi një paragraf të shkurtër në pjesën e poshtme të faqes së tretë nën një titull të ngjashëm.
Ndërkohë, nuk pati asnjë deklaratë zyrtare nga presidenca egjiptiane e Abdelfetah el-Sisit lidhur me vdekjen e Mursit.
Varrimi i tij, i ndjekur nga disa prej anëtarëve të familjes, ishte një çështje e ngutshme që u zhvillua në agim, ndërsa zyrtarët e sigurisë bënin roje jashtë varrezave të Al-Wafaa wa al-Amal. Asnjë gazetar apo ndonjë tjetër mik i tij nuk u lejua të ishte i pranishëm.
Djali i tij Ahmed Mursi shkroi në Facebook se “familja e lau trupin e tij fisnik në spitalin e burgut Tora, dhe bëri lutje për të në xhaminë e burgut”.
Sipas avokatit të Mursi, ish-presidenti donte të varrosej në fshatin e tij në provincën Sharqiyah, por autoritetet egjiptiane vendosën ta varrosnin në një varrezë në Medinat Nasr të Kajros.
Nën regjimin e ri të Abdelfetah el-Sisi, censura e mediave në Egjipt ka shënuar rritje me ritëm drastik. Në vitin 2018, presidenti ratifikoi Ligjin për Krimet kibernetike dhe ato në teknologjinë e informacionit, i gjoja se synon të luftojë “ekstremizmin” dhe “terrorizmin”.
Megjithatë, ligji u lejon autoriteteve egjiptiane të bllokojnë faqet e internetit që konsiderohen “kërcënim për sigurinë kombëtare” ose “ekonominë kombëtare”. Individët që vizitojnë këto faqe mund të përballen me gjoba të mëdha dhe dënime.
Sipas Shoqatës për Lirinë e Mendimit dhe Shprehjes (AFTE), Kajro ka bllokuar qasjen në pothuajse 500 faqe interneti, shumica e të cilave i përkasin organizatave të medias. Për më tepër, të paktën 35 gazetarë, gazetarë qytetarë dhe bloger besohet të burgosur në Egjipt.
Mursi, i cili kishte qenë pas hekurave për gati gjashtë vjet, kishte një histori të gjatë të problemeve shëndetësore, përfshirë diabetin, si dhe sëmundjen e mëlçisë dhe veshkave.
Ai ishte duke u përballur me të paktën gjashtë gjyqe në kohën e vdekjes së tij dhe gjithashtu po vuante një dënim me 20 vjet burg për një dënim që vjen nga “vrasja e protestuesve gjatë demonstratave në vitin 2012”. Përveç kësaj, ai po vuante një dënim me burgim të përjetshëm për “piunazh në një në lidhje me gjendjen e Gjirit të Katarit”.
Akuza të tjera kundër ish-presidentit përfshinin ikjen nga burgu, fyerjen e gjyqësorit dhe përfshirjen në “terrorizëm”.
Mbështetësit e tij thonë se akuzat kundër tij ishin të motivuara politikisht.
Ka pasur gjithashtu raporte se Mursi ishte keqtrajtuar dhe torturuar në burg. Tani, ka aktivistë që thonë se vdekja e tij duhet të shihet në kontekstin e izolimit sistematik të autoriteteve egjiptiane dhe keqtrajtimit të të burgosurve politikë.
Human Rights Watch e quajti lajmin e vdekjes së Mursit si “të tmerrshme”, por “krejtësisht të parashikueshme”, duke përmendur “dështimin e autoriteteve për t’i dhënë atij kujdesin e duhur mjekësor”. /tesheshi.com/
