Nga Bashkim Kastrati
Sektori i shëndetësisë publike në Kosovë vazhdon të mbetet në gjendje të rëndë. Në këto institucione shërbime marrin vetëm qytetarët jo mirë ekonomikisht, ndërsa ata që kanë një standard jetësor më të mirë shkojnë në klinika private.
Se gjendja në shëndetësinë publike është në gjendje të keqe, tregon edhe fakti se politikanët, apo zyrtarët e lartë shtetërorë, nuk shkojnë të marrin shërbime dhe të trajtohen në këto institucione të cilat i udhëheqin, por ata shkojnë në spitale private dhe jashtë Kosovës.
Pra, spitalet dhe Qendra Klinike Universitare e Kosovës nuk “ua mbushin syrin” të lartcekurave. Ata, siç duket konsiderojnë se aty nuk ofrohen shërbime të mira ose nuk kanë besim në to.
Duke mos u trajtuar vet dhe duke mos i trajtuar as familjarët në spitalet e Kosovës, zyrtarët e lartë ndoshta nuk i dinë praktikisht nevojat reale të institucioneve shëndetësore dhe rëndësinë e investimit. Në QKUK shpesh ka mungesë të barnave dhe pajisjeve elementare si dorëza, penj, etj., etj.
Secila qeveri e deritashme e Kosovës, ndër top-prioritetet për zhvillim ka veçuar edhe Shëndetësinë, por me gjasë, ende liderët politikë nuk e kanë fituar besimin në këtë sistem.
Së fundit, edhe ish-kryeministri i Kosovës, Isa Mustafa, pas disa komplikimeve shëndetësore, zgjoshi që fillimisht të kërkonte mjekim në një spital privat në Prishtinë, por pastaj fluturoi drejt Gjermanisë. Si për ironi, partia e ish-kryeministrit Mustafa ka udhëhequr më së shumti me Ministrinë e Shëndetësisë.
Ky është vetëm rasti i fundit, pasi që ndër vite ka pasur raste të shumta kur zyrtarë të lartë, ministra, deputetë etj., shkojnë jashtë vendit për trajtim mjekësor. Në këso raste, qeveria ndan edhe mjete shtesë për trajtimin e tyre, duke i ndihmuar ata financiarisht për t’i përballuar shpenzimet. Pra ndahen para me procedura të shpejta për qeveritarët, por për qytetarët e tjerë ka procedura të shumta dhe një pjesë e tyre përveç që duhet të presin me muaj të tërë, nuk i ndahen fare mjete financiare në mungesë të buxhetit.
Profesionistët shëndetësorë brenda Qendrës Klinike Universitare të Kosovës thonë se prej vitesh nuk kanë trajtuar zyrtarë shtetërorë. Madje, ata thonë se nga mediat marrin informata se ata ikin jashtë vendit për trajtim.
Siç duket, lënia në mjerim e sektorit të shëndetësisë nga ana e udhëheqësve nuk shkakton asnjë problem për këta të fundit, pasi që ata kanë mundësi të marrin shërbime të mira në sektorin privat apo jashtë vendit. Ndërsa edhe në këtë rast e pësojnë qytetarët e thjeshtë, pasi që ata duhet të marrin shërbime në një institucione shëndetësor që nuk ka kushte të mira për trajtim, si barna, materiale të nevojshme si dhe nuk mund të kryejnë diagnostikime me aparaturat përkatëse që duhet të ishin në institucionet shëndetësore publike.
“Duhet të penalizon udhëheqësit të cilët kërkojnë trajtim mjekësor jashtë vendit”
Xhemajl Selmani, kryetar i Sindikatës së Qendrës Klinike Universitare të Kosovës (QKUK) ka thënë për tesheshi.com se deri sa të mos krijohet një standard i cili penalizon udhëheqësit të cilët kërkojnë trajtim mjekësor jashtë vendit, këta të fundit nuk do ta trajtojnë shëndetësinë me seriozitetin e duhur.
Ai thotë se politikanët dhe zyrtarët e lartë trajtohen nëpër spitalet private në Kosovë edhe kur nuk marrin rezultate të shpejta dhe të dëshirueshme, po me buxhetin e shtetit trajtohen jashtë shtetit ku kostoja e shërbimit është shumë e lartë.
“Me vite të tëra ua kemi tërhequr vërejtjen që shëndetësia jo vetëm që është lënë pas dore, por edhe po abuzohet me paranë publike që ndahet për shëndetësi dhe se ekziston rreziku që shëndetësia të mbetet edhe pa profesionistë shëndetësor”, thotë Selmani”.
“Në vazhdën e kësaj, tani po u them atyre: ikni me paratë e kursyera të cilat i keni duke ia hequr taksapaguesve në forma të ndryshme sepse atje ku po shkoni keni për t’u takuar me mjekët tanë të cilët kanë ikur nga vendi i tyre, e të cilët kanë bërë emër dhe po ju shërbejnë qytetarëve me të cilët nuk i lidh as gjuha e as gjaku”, u shpreh Selmani.
Ai thotë se mjekët që kanë ikur jashtë vendit në kohën e fundit janë shumë. Ai thotë se kjo ikje do të vazhdojë dhe se “ne do mbetemi deri ne pension, sepse mesatarja e moshës së mjekëve është mbi 52 vjeç dhe në fund do ju mbetet politikanëve që ta merrni në dorë shërbimin shëndetësor. Nëse vazhdoni kështu, nuk shkon kohë e gjatë dhe mund të filloni të shkruani ndonjë hajmali për ata që kërkojnë shërbim shëndetësor”. /tesheshi.com/
