Rasti i një dite më parë kur myftiu i Lezhës u bë “lajm” me kërkesën e tij drejtuar ambasadores Vllahutin për rikthimin e dënimit me vdekje, nxorri në pah një fakt deri më tani të lënë në hije: për herë të parë, në terrenin krejtësisht laik të debatit publik – në rastin e Forumeve Publike për Sigurinë ndërmarrë nga ministri Xhafaj lart e poshtë nëpër Shqipëri – ftohen të jenë të pranishëm dhe jo vetëm si figura, edhe klerikë përkatës të qyteteve ku organizohen forumet.
Ata, sipas kësaj risie qeveritare, referuar burimeve nga dikasteri i Rendit, përcaktohen si zëra të rëndësishëm publikë, pikërisht nga fakti i staturës së tyre fetare mbi forcën e mesazhit që mund të japin.
Deri më sot, prania e tyre ka qenë e kufizuar vetëm në debate televizive për çështje të caktuara por jo në hapësirën publike, atje ku dominon zëri i shtetit me karakter laik.
Kujtojmë se përgjatë gjithë viteve të tranzicionit, në kohë krizash të forta, ka patur zëra që kanë kërkuar një potencim të rolit të komuniteteve fetare dhe krerëve të tyre. I pari ndër ta ka qenë Fatos Lubonja, që edhe pse i vetëpërcaktuar ateist, por konfuz për këtë, e kërkoi me ngulm rolin e tyre paqtues në krizën e ’97-ës. /tesheshi.com/
