Nga Bashkim Kastrati
Fillimi i negociatave politike ndërmjet Qeverisë së Kosovës dhe asaj të Serbisë, nga pala kosovare u arsyetua me faktin se po bëhet në të mirë të Kosovës dhe me qëllim kryesor shuarjen e strukturave paralele dhe integrimin e serbëve në institucionet e Kosovës. Të gjitha marrëveshjet dhe kompromiset e palës së Kosovës arsyetoheshin mbi këtë bazë, sidomos kur ishte fjala që edhe serbët të marrin pjesë në zgjedhjet nacionale të Kosovës të vitit 2014.
Si rezultat i negociatave dhe pjesëmarrjes në zgjedhje të serbëve u krijua “lista serbe”, e cila fitoi 10 vende në Kuvendin e Kosovës dhe dy ministri në Qeveri. Por çuditërisht edhe pse ata punojnë në institucione të Kosovës dhe paguhen nga taksat e qytetarëve të Kosovës, nuk e njohin pavarësinë e Kosovës, por e konsiderojnë Kosovën si pjesë të Serbisë. Ministrat e saj që janë pjesë të Qeverisë së Kosovës mbajnë konferenca në objektin e Qeverisë së Serbisë dhe flasin për çështje të Kosovës. Por ata nuk hezitojnë që t’i përdorin asetet e Kosovës si veturat, derivatet dhe benefite tjera.
Për më shumë edhe kryetarët e komunave serbe që nuk janë në veri, nuk e njohin tashmë pavarësinë e Kosovës, edhe pse një gjë të tillë e kishin bërë paraardhësit e tyre, pasi që kishin filluar ta pranojnë realitetin e ri, që Kosova është e pavarur.
Por ku mbetën serbët që e pranonin pavarësinë e Kosovës, punonin për shtetin e Kosovës dhe dëshironin që Beogradi zyrtarë që mos ketë më ndikim në Kosovë, e as tek serbët që jetojnë në Kosovë. Pas ardhjes së “listës serbe” këta serbë u lanë pas dore nga Qeveria e Kosovës, prioritet iu dha atyre që nuk e pranojnë pavarësinë e Kosovës dhe që punojnë kundër shtetit të Kosovës. E kjo po proklamohet si integrim si serbëve, por në fakt nuk janë integruar serbët, por vetëm është fuqizuar ndikimi i Serbisë në Kosovë.
Shembull tipik për këtë paraqet ish-ministri i Punës dhe Mirëqenies Sociale Nenad Rashiç. Ai ishte ministër në dy mandate, nuk njihet të ketë pasur ndonjë aferë korruptive që ka qenë publike gjatë mandateve të tij. Rashiç e pranonte shtetin e pavarur të Kosovës, realitetin e ri, në çdo intervistë fliste shqip, iu bënte thirrje serbëve të Kosovës që të integrohen në institucionet e Kosovës dhe të mos ndikohen nga Beogradi. E pikërisht për këtë ai shpesh është përplasur edhe me Qeverinë e Serbisë, e cila ia ka tërhequr vërejtjen që të mos e pranojë pavarësinë e Kosovës dhe mos të tentojë që t’i integrojë serbët në institucionet e pavarura.
Por pas ardhjes së “listës serbe”, Rashiç u braktis nga Qeveria e Kosovës, nuk u mor më në konsideratë, nuk iu dha asnjë post. Ai u zëvendësua me serbë të tjerë, por të cilët nuk e njohin shtetin e Kosovës.
I gjendur në këtë situatë Rashiç gjeti zgjidhjen. Pasi nuk iu dha asnjë mundësi nga Qeveria e Kosovës, ai iu drejtua Qeverisë së Serbisë, me të cilët ishte në “hasmëri” për shkak se e pranonte Kosovën si shtet të pavarur e sovran. Çuditërisht qeveria serbe e punësoi atë në Qeverinë e Kosovës. Pra deri në këtë nivel ka arritur ndikimi i Serbisë në Kosovë. Kjo ndodhi pasi që Rashiç u bë pjesë e “listës serbe” dhe tash duhet që të punojë me direktivat e Serbisë. Këtë ai e konfirmoi për emisionin “komiteti”.
“Fakti është se krijohet përshtypja se më lehtë është për politikanët kosovarë që të bisedojnë me një palë që në këtë rast është Beogradi, duke neglizhuar krejt mendimin e serbëve që jetojnë në Kosovë, e që e them me të drejt se janë të neglizhuar. Tash po ua tregoj rastin e fundit i cili e vulos këtë qëndrimin tim apo mendimin tim: Unë tash së fundi kam marr dy pozita si këshilltar në dy ministri të ndryshme, dhe a e dini ku i kam marrë ato pozita? I kam marrë në Beograd. Pra Beogradi ka mundësuar për mua dy pozita të këshilltarëve në Qeverinë e Kosovës. Ky është paradoksi që nganjëherë po duket vetëm tek ne, përmes Beogradit e realizon të drejtën në Prishtinë”, u shpreh Rashiç.
Ky pra është rezultati i negociatave dhe kompromiseve në marrëveshje, e cila e ka fuqizuar shumë Serbinë brenda Kosovës, ndërsa i ka përjashtuar serbët që e njihnin Kosovën si shtet të pavarur.
Përpjekjet e Rashiçit për t’i integruar serbët, neglizhenca nga Qeveria e Kosovës dhe përfshirja e tij në “listën serbe”
Ish-ministri Rashiç kohë pas kohe është përplasur me Qeverinë e Serbisë për shkak se ai e ka njohur pavarësinë e Kosovës, pa punuar për institucionet e Kosovës dhe ka qenë kundër ndikimit që e ka Beogradi tek serbët e Kosovës, duke e konsideruar këtë ndikim si të dëmshëm.
Ish-ministri Nenad Rashiç me 10 shtator 2015 ka thënë se nga marrëveshja e Brukselit nuk kanë përfituar asgjë serbët e Kosovës, por përkundrazi ata janë humbës. “Humbësit më të mëdhenj janë serbët e Kosovës”, ka thënë Rashiç në Klan Kosova.
Sa i përket Asocacionit të komunave serbe, ai ka thënë se Asociacioni është një mundësi e mirë për Beogradin që të ushtrojë më shumë fuqi politike në komunat serbe në Kosovë.
“Nuk do të ketë kompetenca ekzekutive, por sidoqoftë ata do të kenë fuqi politike që të ndikojnë në çdo komunë dhe në fund Asociacioni është krijuar nga mosbesimi i Beogradit tek komunat serbe të Kosovës. Sa di unë, institucionet e Serbisë i paguajnë ende rreth 25 mijë persona. Por, po bisedoj me njerëz dhe po kuptoj se këto janë planet e Beogradit. Ata e ndiejnë veten të tradhtuar”, është shprehur Rashiç.
Rashiç në vitin 2013 kishte përplasje me Beogradin zyrtar për shkak të ndërhyrjes së tyre në fushatën paraelektorale në Kosovë. Ai me 16 tetor të vitit 2013 ka deklaruar se nuk pajtohet me ndërhyrjen e Qeverisë së Serbisë në procesin zgjedhor për zgjedhjet e 3 nëntorit në Kosovë, përkatësisht me mbështetjen e pa rezervë që po i jepet nga zyrtarët e lartë serb Iniciativës Qytetare Serbe.
Sipas tij, do të ishte krejt normale, që Beogradi të kërkonte pjesëmarrjen sa më të madhe të serbëve në zgjedhjet e 3 nëntorit, por jo që të dalë hapur në përkrahje të një subjekti politik, në këtë rast të Iniciativës Qytetare Serbe.
“Edhe njëherë po e them se kjo nuk është demokratike. Me Marrëveshjen e fundit zyrtarët e Beogradit e kanë të lejuar vetëm thirrjen e serbëve që të dalin në zgjedhje, por duket se prapë do ta kemi problemin e njëjtë, siç e kemi pasur edhe më herët”, ka theksuar ai.
Nenad Rashiç gjithashtu në janar të viti 2015 është përplasur me Beogradin zyrtar edhe sa i përket rastit të Aleksander Jabllanoviç, duke thënë se ai duhet të jap dorëheqje, pasi që pati fyer nënat e të zhdukurve të luftës në Kosovë.
“Lista serbe” e ka vlerësuar jo serioze dhe të turpshme deklaratën e Nenad Rashiç sipas të cilit Jabllanoviç duhet të japë dorëheqje morale nga posti i ministrit.
“Jo serioze,e turpshme dhe krejt e papranueshme është kur ata që nuk kanë pasur asnjë fije morali derisa kanë qenë pjesë e Qeverisë së Kosovës të flasin se si duhet të veprojnë moralisht ministrat aktual”, pati deklaruar “lista serbe”.
Rashiç ka qenë edhe pro themelimit të ushtrisë së Kosovës, në këmbim të vendeve të rezervuara. Por edhe rezistencës së tij i ka ardh fundi. Ai pasi u neglizhua krejtësisht nga Qeveria e Kosovës, me 18 shtator 2015, iu bashkua “listës serbe” e rrjedhimisht edhe ndikimit të drejtpërdrejt të Beogradit.
Ai tashme duhet që t’i nënshtrohet politikave të “listës serbe” e cila qëllim kryesor e ka forcimin e strukturave paralele dhe shtrirjen e ndikimit të Serbisë në Kosovë. Pra nuk do të jetë çudi që në ditët në vijim vetë Rashiç të deklarohet kundër krijimit të ushtrisë së Kosovës, apo edhe ndonjë ditë të mos e pranojë pavarësinë e Kosovës. E gjithë kjo si pasojë e marrëveshjeve që Kosova i ka bërë me Serbinë. /tesheshi.com/
