Nga Blendi Gashi
Ramush Haradinaj, edhe pse kryeministër (posti me vendimarrjen me të madhe në vend), ka dëshmuar ditëve të fundit se nuk i ka plotësisht duart e lira.
Rasti i arrestimit të gylenistëve ka shpërfaqur qartë se “muskujt” më të fortë vazhdon t’i ketë Hashim Thaçi, presidenti aktual.
Kjo u dëshmua me vendimin që Haradinaj mori për lirimin nga detyra të ministrit të Brendshëm, Flamur Sefaj dhe drejtorit të Intelegjencës, Driton Gashi.
Ndërsa në rastin e parë Ramushit i eci fjala dhe AKR-ja përkundër disa kundërshtimeve u pajtua ta lirojë nga detyra ministrin e tyre (sigurisht pasi kryeminsitri mund t’i ketë kërcënuar se mund t’i largojë nga qeveria, pasi veç me dy deputet mbajnë disa ministri e sigurisht numër të madh zv.ministrash), në rastin e dytë, të kryespiunit, Haradinajn u dorëzua.
Se nuk e ka në dorë krejtësisht fatin e kreut të Intelegjencës edhe pse e liroi nga detyra, Haradinaj e pranoi në një konferencë për media të mërkurën pas mbledhjes së qeverisë, duke thënë se ai ka kryer pjesën që i takon dhe tashmë vendimi final mbetet tek presidenti.
“I pari (Sefaj)është kompetencë vetëm e imja. I dyti (Gashi) është proces i përbashkët, gjysma e punës është kry. Unë e kam liru, ndërsa gjysma e punës ka mbetur”, deklaroi Haradinaj.
Ndërsa mosveprimi i Thaçit për rastin e kreut të AKI-së është raportuar si shpërfillje ndaj Haradinajt, ky i fundit thotë që nuk ka dëgjuar që presidenti të ketë thënë që refuzon ta shkarkojë Gashin nga detyra.
“Tani presidenti i ka procedurat e veta. Nuk e kam dëgjuar që ka dhënë që e refuzon”, ka thënë Haradinaj.
Por kryeministri nuk ka treguar se si do të veprojë nëse Thaçi nuk merr vendim që përfundimisht ta shkarkojë nga detyra kryespiunin.
Nëse kjo ndodh, përveçse do prishnin raportet dy krerët më të lartë të vendit (çka së fundmi është raportuar se ka krisje të mëdha mes tyre, por që u zbutën paksa në drekën e pashkëve të shtruar nga ministri Pal Lekaj), atëherë Haradinaj do të cilësohej edhe si një kryeministër që nuk i përfillën vendimet.
Për të mos dalë publikisht se Thaçi ka “muskujt” më të fortë se Haradinaj, ky i fundit është dashur të paktën të jetë më i kujdesshëm që para se ta marrë vendimin për lirimin e kryespiunit të dakordohet me presidentin.
Mbetet të shihet në ditët në vijim nëse Thaçi do të kryejë apo jo edhe gjysmën e punës, siç thotë Haradinaj, pra ta merr edhe ai vendimin për lirimin e kryespiunit nga detyra. /tesheshi.com/
