Socialisti Damian Gjiknuri dhe një ftesë e tij përcjellë PD-së për t’i dhënë dorën e fundit reformës zgjedhore, kjo në pozitën e re të bashkëryetarit të komisionit të kësaj reforme, ka nxjerrë në pah dy PD-të e krijuar pas aktit të djegies së mandateve; atë që jashtë parlamentit e atë brenda, përfaqsuar nga emrat simbol të Rudina Hajdarit dhe Myslim Murrizit.
Në seancën e kësaj të mërkure, znj. Hajdari reagoi ashpër ndaj Gjiknurit, ku vetvetiu doli në pah krisja e madhe. Ajo këmbënguli që si PD duhej të njihej ajo që ishte në parlament e jo jashtë saj.
“Ata deputetë që ishin sot nuk janë më, dhe ju e keni bërë marrëveshjen me ta e jo me ne. Me këtë parlament që është sot, erdhi si erdhi puna tanimë i përket të shkuarës. Deklaratat e zotit Gjiknuri ishin shëmbëlltyra më e keqe se çfarë ndodh në këtë sistem. Zoti Gjiknuri pa pikë turpi, jashtë Kushtetutës, i shtriu dorën opozitës dhe tha: do bëheni pjesë në komisionin e reformës zgjedhore.
Ky komision duhet të mbyllet, duhet të merren parasysh këta deputetë që kanë ardhur nga një listë e caktuar, dhe ju duhet të shpalosni idetë tuaja, përsa i përket sistemit zgjedhor. Unë do jap propozimet e mia si deputete se çfarë dua të shoh unë të ndodhë në muajt e ardhshëm”, tha Rudina Hajdari.
Me këtë qëndrim të kësaj të fundit komplikohet akoma dhe me tepër situata brenda kampit të opozitës e jo vetëm. Ndërkohë, ndërkombëtarët ende nuk janë shprehur për këtë situatë të re.
Qëndrimet e fundit të deputetes Rudina Hajdari kanë nxjerrë në pah dhe një nerv të saj politik të trashëguar nga i ati i ndjerë, i pashfaqur deri më sot. /tesheshi.com/
