Kompensimi dhe faljet zyrtare janë të nevojshme për të korrigjuar pjesërisht padrejtësinë shekullore racore, tha Komisionerja e Lartëe KB për të Drejtat e Njeriut, Michelle Bachelet.
Referuar zhvillimeve të fundit në Shtetet e Bashkuara, pra protestave që pasuan vdekjen e afro-amerikanit George Floyd gjatë një arrestimi policor brutal, ajo tha se “pas dhunës racore të sotme, racizmi sistemik dhe politikat diskriminuese janë një dështim për të njohur dhe konfrontuar trashëgiminë e tregtisë së skllevërve dhe kolonializmit”.
Shtetet nuk duhet të reformojnë vetëm policinë, por gjithashtu duhet të adresojnë pabarazitë racore, të cilat çojnë në kujdes më të dobët shëndetësor, arsim të papërshtatshëm, pengesa për punësimin, nivele më të larta të burgjeve dhe kufizime në votime, shtoi ajo.
“Koha është thelbësore. Durimi është i humbur”, theksoi Bachelet.
Vëllai i George Floyd, Philonise Floyd, tha se afrikano-amerikanët në Shtetet e Bashkuara kanë nevojë për ndihmën e Këshillit të KB për të mbrojtur të drejtat e tyre.
Në një mesazh video drejtuar Këshillit me qendër në Gjenevë, ai i bëri thirrje organit të KB të fillojë një hetim zyrtar mbi racizmin dhe dhunën e policisë kundër afrikano-amerikanëve, siç propozohet nga shtetet afrikane.
“Ju në OKB jeni rojtarët e vëllezërve dhe motrave tuaja në Amerikë dhe ju keni fuqinë të na ndihmoni të marrim drejtësi për vëllain tim George,” tha Philonise Floyd.
“Jetët e zeza nuk janë të rëndësishme në Shtetet e Bashkuara … Siç e keni parë në video se vëllai im u torturua dhe u vra, kjo është se si policia i trajton afrikano-amerikanët”, tha ai. /tesheshi.com/
