Ish-Presidenti rumun Ion Iliesku është akuzuar për krime kundër njerëzimit për rolin e tij në disa vrasje gjatë revolucionit kaotik dhe të përgjakshëm anti-komunist në vitin 1989.
Iliesku, 89 vjeç, ka thënë në mënyrë të përsëritur se është i pafajshëm. Ai ishte shumë popullor pas rënies së diktatorit komunist Nikola Çaushesku, i cili u rrëzuar dhe u pushkatua në dhjetor 1989.
Megjithatë, qindra njerëz u vranë në trazira dhe kundërshtarët politikë akuzuan Iliesku për “rrëmbimin” e revolucionit të kombit.
“Hetimi i kryer nga prokurorët ushtarakë është një nga qëllimet kryesore që unë kam theksuar tre vjet më parë: zgjidhjen e rasteve historike”, u tha gazetarëve, Prokurori i Përgjithshëm Augustin Lazar. Data e fillimit të gjykimit nuk është e specifikuar.
Aktakuza erdhi pasi prokurorët, në dhjetor 2018 akuzuan Ilieskun për formimin e një grupi në vitin 1989 i cili donte të merrte pushtetin dhe të fitonte legjitimitet politik.
Duke përdorur komunikimet dhe televizionet, grupi u trajtua me “devijime të gjëra dhe komplekse”, edhe pasi Çaushesku u arratis nga Bukureshti më 22 dhjetor 1989.
Grupi ka krijuar edhe një psikozë të terrorizmit, duke shkaktuar një luftë vëllavrasëse, të shtëna kaotike dhe komanda kontradiktore ushtarake, të cilat çuan në vdekjen e 862 personave dhe plagosjen e 2.150 njerëzve pasi Çaushesku u përmbys – thuhet në aktakuzë.
Ushtarët kanë gjuajtur 13 milionë municion. Një pjesë e këtij plani ishte gjithashtu dënimi dhe likuidimi i Çausheskut dhe gruas së tij Elena, siç dhe ndodhi.
Presidenti i përkohshëm Iliesku deklaroi një parlament kalimtar në shkurt 1990. Si një kandidat i Frontit Kombëtar të Shpëtimit, ai fitoi 85 përqind të votave në zgjedhjet majit të vitit 1990.
Kritikët brenda dhe jashtë vendit e akuzojnë Ilieskun, i cili dha dorëheqjen në vitin 2004, si dhe politikanë të tjerë, për bllokim të reformave politike me qëllim mbrojtjen e trashëgimisë politike dhe elitës së kohës komuniste.
Vitin e kaluar, Iliesku kreu një operacion në zemër dhe mjekët thonë se është ende i qëndrueshëm fizikisht.
Para rënies së Çausheskut, Iliesku në një kohë ishte Ministër i Rinisë dhe zyrtar i Partisë Komuniste, por me pas pati një distancim nga pushteti.
Në vitin 1984 ai u bë përsëri ministër, por u persekutua pas një grindjeje me një prej të afërmve të Çausheskut.
E pra, kjo që po ndodh në Rumani, ku hapet një proces për një zhvillim politik me pasoja sociale e njerëzore të afro 30 viteve më parë, është e paimagjinueshme për realitetin politik shqiptar. Shumë ngjarje e zhvillime dramatike, te ne janë të groposura nga koha.
Është kjo e fundit që falë një sistemi drejtësie të amoralshëm, arrin të rehabilitojë e t’i ofrojë me status normal edhe në të tanishmen, shumë figura politike me dosje të rënda me implikime në krime apo akte korruptive.
Dhe kjo jo për zhvillime të 30 viteve më parë, por dhe të më pak se 10 sosh, ende të freskëta në kujtesën e opinionit. /tesheshi.com/
