Një juri e Karolinës së Jugut të enjten e shpalli fajtor ish-avokatin e profilit të lartë Richard Alex Murdaugh për vrasjen e gruas dhe djalit të tij, pas gjashtë javësh seancash që tërhoqën vëmendjen e publikut në të gjithë Shtetet e Bashkuara.
Juria prej 12 anëtarësh, pas gati tre orësh diskutimi, e gjeti Murdaugh, 54 vjeç, fajtor për dy akuza për vrasjen e gruas së tij Maggie, 52 vjeçe, dhe djalit më të vogël Paul, 22 vjeç, të cilët u ekzekutuan nga afër në pronën e tyre familjare, më 7 qershor 2021.
Murdaugh mbajti pafajësinë e tij gjatë seancave dramatike gjashtë-javore dhe qëndroi pa emocione ndërsa lexohej vendimi. Avokati i tij kërkoi anulimin e aktgjykimit, të cilin gjyqtari e refuzoi menjëherë.
“Provat e fajit janë të pakundërshtueshme”, tha gjykatësi Clifton Neëman.
Murdaugh është një pasardhës i një familjeje ligjore me ndikim nga zona e Charleston. Edhe pse u deklarua i pafajshëm për vrasjet, ai pranoi se kishte gënjyer për alibinë e tij dhe krimet financiare që kishte kryer, gjë që dëmtoi besueshmërinë e tij tek juria.
Tashmë ai do jetë në burgim të përjetshëm. Rasti tërhoqi vëmendjen intensive të medias duke pasur parasysh fuqinë e madhe politike të familjes në kontenë Colleton, ku u zhvillua gjyqi. Për dekada, deri në vitin 2006, anëtarët e familjes shërbyen si prokurorë në zonë dhe Murdaugh ishte një avokat i shquar në Deep South.
Gjatë gjyqit, prokurorët e portretizuan Murdaugh si një gënjeshtar dhe argumentuan se vetëm ai kishte mjetet dhe mundësinë për të kryer vrasjet. Ata nxorën 60 dëshmitarë, duke përfshirë miq dhe kolegë, të cilët dëshmuan se ai kishte vjedhur miliona nga firma e tij ligjore për më shumë se një dekadë. Ata pretenduan se ai vrau gruan dhe djalin e tij për të mbuluar krimet e supozuara financiare, duke përfshirë vjedhjen e miliona dollarëve nga partnerët dhe klientët për të financuar varësinë e tij ndaj opiumit dhe stilin e jetës luksoze.
Ndër provat më të forta ishte pranimi i Murdaugh javën e kaluar të një alibie të rreme në natën e vrasjeve.
Murdaugh ndryshoi dëshminë e tij pasi juria dëgjoi prova audio se ai ishte në vendin e krimit disa minuta përpara se të kryheshin vrasjet. Çështja u ndoq me vëmendje në Shtetet e Bashkuara të Amerikës, ku të gjitha mediat, edhe ato më seriozet, zbërthyen jetën e kësaj familjeje të pasur, krenare për tre breza prokurorësh dhe gjyqtarësh.
Kujtojmë se dokumentari, “Murdaugh Murders: A Southern Scandal” ishte një nga filmat më të ndjekur në Netflix në SHBA javën e kaluar. /tesheshi.com/
