Gjyata Kushtetuese, Gjykata e Lartë por edhe gjykata të tjera të vendit kanë dhënë disa vendime kohët e fundit që kanë tronditur fuqishëm opinionin publik.
Aldo Bare dhe Lulzim Berisha, por edhe “Hakmarrja për Drejtësi”, janë tre rastet më të bujshme që janë përmendur nga politike, por lista është më e gjatë se kaq.
Dje e kishte radhën Aldo Bare. Gjykata Kushtetuese ka marrë vendimin e rikthimit për rigjykim të dosjes së tij.
I dënuari me burgim të përjetshëm për ngjarje të ndryshme në zonën e Lushnjes, u kap në Turqi ku qëndronte i fshehur, ndërsa në Shqipëri gjykatat e dënuan atë pa një pa dy. Pas një seri vendimesh, burgimi i përjetshëm për të qëndroi në fuqi. Por, me avokatët e tij i dënuari vazhdoi betejën në Gjykatën Kushtetuese.
Kjo e funditka marrë një vendim duke e rikthyer çështjen e tij në gjykatë me arsyetimin e shkeljeve të shumta proceduriale.
Pas këtij vendimi, dosja e Aldo Bares do të kalojë për rigjykim në Gjykatën e Lartë.
Ajo që nuk është bërë gjithë këto vite, duket se po merr jetë tani kur gjyqtarët ndihen sikur janë lëshuar nga frerët e kushedi se kujt.
Për të gjitha këto rastet u thanë se ka pasur shkelje proceduriale në vendimet e mëparshme.
Një mundësi aspak e vogël që mund të ketë ndodhur, por gjykata më e lartë e vendit nuk duhet që t’i bjerë me shpatë vendimeve të gjyqësorit aq kollaj, aq më pak në një situatë ku vendi është i mbarsur me një tension politik.
Ministri i Drejtësisë, Petrit Vasili, e pakta duhet të çojë një inspektim për të gjitha këto vendime dhe të bëhet publikisht në mënyrë transparente përfundimi i tyre.
Nga ana tjetër është detyrim i Ministrit të Brendshëm qoftë edhe Kryeministrit Edi Rama që të dalin në publik për këto vendime seri të shkallëve më të larta të gjyqësorit shqiptar.
Nuk kuptohet sesi dora e lëshuar e gjyqtarëve më të rëndësishëm të shtetit shqiptar, atyre që duhet të intepretojnë Kushtetutën e Republikës, ka marrë mbarë thuajse të gjithë fotoalbumin më të rëndësishëm kriminal të vendit.
Çfarë po ndodh? Ndërsa për Vetingun Gjykata Kushtetuese mori një vendim me zor dhe të ndarë mes njëri-tjetrit, për lirimin e Aldo Bares thuhet se vendimi është marrë 5 me 2.
Pra ka një dominancë pro tij.
Si ka mundësi? Dhe vjen natyrshmë shpërthimi i Berishës, si të ishte nëj skenar i lexuar dhe i ditur kohë më parë. Vetë ish-lideri demokrat i ka paralajmëruar me kohë zhvillime të tilla.
Po ku e mori vesh Berisha që Aldo Barej ndodhej në Kushtetuese dhe procedurat ishin pranë një rishqyrtimi të çështjes?
Fakt është që tani fushata elektorale do të bëhet me emtat e “vipave” të krimit në vend dhe debatet për to do të zëvendësojë atë mbi programet dhe njerëzit.
Dikush duhet të ndërhyjë, pasi precedent mund të kthehet në fenomen…/tesheshi.com/
