Në një rast të paprecendetë, Prokuroria e Krimeve të rënda ka kërkuar arrestimin e ish-ministrit të brendshëm shqiptar, aktualisht deputet i PS-së, Saimir Tahiri. Akuza vjen për lidhje me trafikun e drogës dhe bazohetmbi disa përgjime të bëra nga organet italiane dhe të publikuara në median shqiptare së pari nga organi zyrtar i opozitës, Rilindja Demokratike.
Kërkesa për arrestim është firmosur nga prokurori Besim Hardarmataj, i cili ishte sot në Kuvend për të mbrojtur “arrestimin” e Tahirit.
Por ndërkohë disa eksponentë të politikës dhe të medias kanë hedhur dyshime mbi pavarësinë e prokurorisë në këtë çështje dhe për mundësinë e përdorimit të saj politikisht, në rastin konkret nga opozita.
Të parët që hodhën dyshime mbi mënyrën se si prokuroria po sillet ndaj rastit ishin gazetarët e kronikës dhe më pas vetë pasardhësi i Tahirit në ministrinë e Rendit, Fatmir Xhafaj.
Gazetari investigativ, Artan Hoxha në emisionin “Të Paekspozuarit” tha se Hajdarmataj është njeriu i ish-kryeministrit Sali Berisha. Ai hodhi dyshime se videon e publikuar një ditë më parë nga “qytetari dixhital” për tonelatat e drogës në Babicë, Berisha e ka siguruar pikërisht nga nga prokurori Besim Hajdarmataj, i cili ka origjinën nga Tropoja ashtu si dhe Berisha, madje besohet se është kushëri i afërt i tij.
Ndërsa vetë ministri Xhafa i bëri thirrje prokurorisë që të mos politizohej dhe e cilësoi kërkesën për arrestim të Tahirit të paprecedentë e të pabazuar në fakte.
“Kjo është një çështje e drejtësisë italiane dhe pala shqiptare s’ka asnjë kontribut. Nga pikpamja ligjore dhe legale ajo çka përmban kërkesa e prokurorisë nuk përmban asgjë. Këtë opinion e kam për atë që kam parë. Nëse prokuroria ka prova të tjera shtesë. Le të shohim. Flas vetëm për atë që kam parë. Po shënohen precedentë të rrezikshëm. Prokurori i cili duhej të mblidhte provat më parë u përdor politikisht duke dëmtuar hetimet duke bere video”, deklaroi Xhafaj.
Por edhe prokurorë të tjerë të përfshirë në hetimin e Tahirit, Elisabeta Imeraj dhe Gentian Osmani, janë po ashtu nga Tropoja dhe kanë lidhje me familjen e Berishës.
Përveç kësaj, një detaj tjetër është harruar në këtë histori: fakti që dosja e plotë me 400 faqe përgjime që duhej të ishte konfidenciale mes organeve italiane dhe atyre shqiptare, ka përfunduar në një media periferike për nga rëndësia, por e rëndësishme për rolin që ka si organ zyrtar i opozitës. Ishte RD-ja ajo që publikoi dosjen e plotë duke treguar lidhjen direkt mes kësaj partie dhe hetuesve që e kishin në dorë këtë dosje.
Rastësi?! Duket si shumë përkime për të qenë vetëm rastësi, por gjithçka mbetet për t’u parë në vijim.
Kur akoma vetingu në drejtësi nuk ka nisur, strukturat e vjetra të drejtësisë të lidhura me fijet e pushtetit politik, vijojnë të jenë në këmbë./tesheshi.com/
