Nga Blendi Gashi
Legjislatura e lënë pas e parlamentit kosovar, la shijen e hidhur të konfliktit politik, ku u vu re mungesa e ndokujt aty, që me urti e pleqni, t’i pajtonte palët mes vedi. Pot duket se te legjislatura e re do jetë një i tillë.
Rasim Selmanaj, deputet i AAK-së, ish-kryetar i Deçanit, me profesion është profesor Kimi-Biologjisë, ndërkohë që njohjen më të madhe në rajonin e Dukagjinit e ka si një “Anton Çetë” i angazhuar në pajtimin e familjeve që janë në hasmëri.
Tesheshi.com zhvilloi një bisedë ndryshe me deputetin e ri Selmanaj, pra, jo për punën që do bëjë në institucionin ligjvënës, por për kontributin që ka dhënë në faljen e gjakrave ndër vite.
Ai ka treguar sesa të vështirë e ka pasur të ndërmjetësojë tek familjet nën hasmëri, dhe nëse është i gatshëm të pajtojë edhe të tjera nëse i kërkohet një gjë e tillë.
“Unë edhe para luftës së fundit kam qenë veprimtarë në aktivitete të ndryshëm në pajtimin e gjaqeve. Dhe këtë gjë e kam vazhduar edhe paslufte. Jam shumë i afërt më të gjithë poashtu kam krijuar një besueshmëri tek të gjithë dhe kjo ka bërë që të mos ndalem”, thotë Selmanaj për tesheshi.com
Megjithatë, ai shton se në këtë mision është ndihmuar shumë dhe nga komuniteti fetar.
“Në vitin 2016 dhe 2017 me ndërmjetësimin tim por me ndihmën edhe të komunitetit fetar për çka jam falënderues kemi arritë të pajtojmë familje në fshatrat Dranoc , Dashinoc , Ratish , Strellc, por edhe në Pejë, në Koshare si dhe në Shqipëri poashtu disa ngatërresa familjare”, tregon Selmanaj.
Për deputetin “pleqnar”, edhe pse misioni i tij ngjan heroik, ai e nuk e konsideron të tillë për nga vështirësia.
“Kur ekziston vullneti për të qenë sa më afër qytetarit padyshim se as suksesi nuk mungon. Ani pse me dhjetëra herë kam qenë te familjet në hasmëri për të arritur qëllimit, pra që ato të ja shtrinë dorën e pajtimit njëra-tjetrës nuk jam zbehë për asnjë qastë. Krejt këtë e kam bërë që familjet të jetojnë në mirësi dhe pasardhësit e tyre mos të jetojnë me ndjenjën e frikës”, thotë ai.
Selmanaj tregon se arsyet e hasmërisë mes familjeve kanë qenë nga më të ndryshmet.
“Kam pajtuar familje që kanë qenë në hasmëri për shkak të aksidenteve fatale të komunikacionit, pra ku pjesëtari i njërës familje e ka goditur me veturë për vdekje anëtarin e familjes tjetër. Poashtu kam pajtuar dy familje që kanë qenë pasur të vrarë mes tyre anëtarë të familjes me paramendim dhe pa paramendim, si dhe kam pajtuar familje për ngatërresa të tjera”, thotë ai.
Edhe pse nuk e di numrin e saktë të familjeve në komunën e Deçanit që ende janë në hasmëri, Selmanaj thotë se edhe pse është zgjedhur deputet është i gatshëm që edhe për këto familje të ulet dhe të ndërmjetësojë që ato t’ia shtrinë njëra-tjetrës dorën e pajtimit.
Kujtojmë se Selmanaj aktualisht mbanë pozitën e kreut të Deçanit, por do e lë këtë post pasi është zgjedhur deputet. Ai në zgjedhjet e 11 qershorit edhe pse i renditur i 92-ti në listën e koalicionit PDK-AAK-NISMA ka fituar 9837 vota, të mjaftueshme për të siguruar ulësen në Kuvend. /tesheshi.com/
