Serbia fillon raprezaljet ndaj shqiptarëve pas kualifikimit të Shqipërisë në finalet e Kampionatit Europian. Policia serbe ka arrestuar dhjetë shqiptarë, banorë të Bujanovcit, vetëm se ata kanë festuar natën e 11 tetorit, pas fitores së përfaqësueses shqiptare në Armeni.
Madje për këtë çështje është zhvilluar edhe një seancë e posaçme në komisionin parlamentar serb të sigurisë, ku ka raportuar ministri i brendshëm, Nebojsha Stefanoviç.
Gjithçka ka ndodhur pas ca parullave, më tepër të karakterit sportiv, të përdorura nga tifozët shqiptarë të Bujanocit. Ata kanë përdorur shprehjen, “Ubij, zakolji, da Srbin ne postoji,” që përbën një zhargon të vënë në punë kryesisht gjatë derbeve të vjetra të Jugosllavisë.
Stefanoviç tha se zyra e prokurorit po e heton me hollësi atë çka ka është pikasur, si nxitje të urrejtjes 
nacionale, racore dhe fetare, dhe si mungesë të tolerancës.
E gjitha ngjau gjatë një festimi të qindra shqiptarëve të Luginës së Preshevës pas ndeshjes me Armeninë, ku Shqipëria u kualifikua për në Kampionatin Europian.
Prokurori publik në Vranjë urdhëroi stacionin policor të Bujanovcit t’i arrestojë dhjetë shqiptarët.
Ndërkaq, probleme ka pasur edhe në Malin e Zi. Siç raportojnë bashkëpunëtorët tanë nga Ulqini, qyteti më i madh malazez me shqiptarë, në asnjë televizion lokal nuk është lejuar transmetimi i ndeshjes mes Armenisë dhe Shqipërisë, e po ashtu dhe përdorimi i simboleve kombëtare. /tesheshi.com/
