Nga Bashkim Kastrati
Pacientët që presin të operohen në Klinikat e Qendrës Klinike Universitare të Kosovës, duhet të blejnë edhe medikamentet dhe pajisjet më elementare për t’u operuar, apo trajtuar aty.
Tesheshi.com ka marrë ankesa gjatë këtyre ditëve se në klinikën e Ortopedisë, për t’u operuar duhet t’i blesh një pjesë të konsiderueshme të pajisjeve mjekësore, ndryshe mbetesh pa u operuar. Familjari i një pacienti që është shtruar në QKUK tregon se është befasuar kur i është dhënë letra se cilat gjera duhet t’i blejë.
“Më thanë që duhet t’i blejë disa gjëra për t’u realizuar operacioni. Pra kam blerë penjtë, mantilat e doktorëve, këtë gypin për frymëmarrje, si dhe disa gjëra tjera, e që vlera totale arriti rreth 50 euro. Nëse është e nevojshme unë blej edhe tjera çfarë të më kërkohet, por është dëshpëruese që klinika nuk i ka këto pajisje elementare. Në këtë spital mos u bëfsh për të ardhur, sepse duhen blerë edhe gjërat elementare, ndërsa duhet thënë që infermierët po kujdesen si është më së miri me ato kushtet dhe mundësitë që i kanë”, thotë ai.
Të gjitha këto mungesa të barnave dhe pajisjeve elementare po ndodhin, kur buxheti i ministrisë së Shëndetësisë është rritur për 7 milionë euro për vitin 2018, ndërsa sërish nuk mungojnë deklaratat nga zyrtarët e ministrisë së Shëndetësisë se QKUK po furnizohet rregullisht me barna të listës esenciale.
Në QKUK të enjten, nuk ka pasur as sisteme infuzioni, shiringa e infuzione, të cilat janë ndër më elementarët e që duhet t’i ketë një shtëpi e vogël shëndeti në një fshat malor, e të mos flasim për QKUK-në që është institucioni shëndetësor më i rëndësishëm në Kosovë.
Se ka pasur mungesë të infuzioneve dhe shiringave e ka konfirmuar edhe gazetari Besart Galica në rrjetin social Facebook. Ai ka publikuar listën me gjërat që i është dashur t’i blejë.
“Po dojmë me festu 10 vjetorin e këtij shteti që në spitalin shtetëror barnat esenciale nuk janë, as gjilpëra! Çfarë mjerimi o Zot! Shkoni e nxeheni për flamuj, as ai kuq e zi e as ky kaltër e verdhë e bardhë nuk kane rëndësi, kur nuk kemi arsim, shëndetësi! Shih në foto, të gjitha u dashtë t’i blej, po dikush që s’ka me i ble”, ka shkruar Galica.
Fusha e shëndetësisë edhe pse është ndër kryesorët dhe më e rëndësishmja për qytetarët e Kosovës, vazhdon të mos jetë prioritet për asnjërën nga qeveritë e deritanishme. Për shëndetësi siç duket, dora qeveritare mbetet e shtrënguar, ndërsa paratë harxhohen në vetura të shtrenjta për ministra e zëvendësministra, për asistentet dhe shoferët e tyre, për mbushje të telefonit, për udhëtime jashtë vendit, mëditje etj. /tesheshi.com/
