Partizani kërkon shpagim pas raportit të publikuar nga UEFA, ku Skënderbeu kampion nxin i tërri nga trukimet. Të kuqtë kërkojnë as më pak e as më shumë, por vetë titullin kampion për sezonin 2015-2016, titull që e kanë marrë “ujqërit e dëborës”, që tashmë po rezultojnë si “tigrat e trukimeve”. Klubi kryeqytetas ka dalë me një deklaratë ku thuhet se prej nga FSHF që të reagojë duke iu kaluar titullin atyre:
“Për aq kohë sa UEFA na njohu si kampionë të Shqipërisë, që na cilësoi si të denjë për të marrë pjesë në Champions League, do ishte e nevojshme që edhe organi që drejton futbollin në Shqipëri, FSHF, të mbante një qëndrim. Ose të bëhej palë me klubin që ka trukuar disa ndeshje sezonin e kaluar (faktuar nga të gjitha organet gjyqësore sportive), ose të distancohej dhe të merrte masat e caktuara ndëshkuese, siç e përcakton rregullorja e këtij sporti. Klubi i Partizanit i kërkon Federatës Shqiptare të Futbollit që t’i kthejë atë pak nder të mbetur sezonit të kaluar, thjesht për të vlerësuar si duhet kontributin e ndershëm të atyre djemve që kanë dhënë maksimumin në fushën e lojës. ‘Demat’ urojnë që pandëshkushmëria e ‘krimit’ të mos bëhet precedent. ‘Më mirë drejtësi të vonuar, se sa drejtësi të munguar’”, thuhet në deklaratën e Partizanit. /tesheshi.com/
