Raporti i ministrave teknikë të PD për zgjedhjet e 25 qershorit do të shërbejë në të ardhmen për forcat politike, por edhe për institucionet shqiptare që të reflektojnë lidhur me sjelljen institucionale dhe politike si dhe për të kryer ndryshimet e duhura në kuadrin ligjor me qëllim garantimin e zgjedhjeve të lira, të ndershme dhe demokratike në të mirë të qytetarëve shqiptarë.
Kështu u shpreh zv.kryeministrja e dorëhequr, Ledina Mandija, përmes një deklarate për mediat, ku gjithashtu njoftoi edhe mbylljen e mandatit të Task Force për zgjedhjet parlamentare të 2017-ës.
Raporti i hartuar në 146 faqe, përfshin informacionet e detajuara mbi fushatën zgjedhore dhe ditën e votimit, sikundër jep rekomandime mbi masat që duhet të merren në mënyrë që në proçeset e ardhshme të shmangen problematikat e deformimit me çdo mjet e mënyrë të vullnetit të qytetarëve shqiptarë me të drejtë vote.
Gjithashtu raporti kërkon nga KLSH të auditojë institucionet mbi përdorimin e fondeve, rekrutimet e stafeve të reja në periudhat zgjedhore apo lëvizjet e tyre, si dhe Prokurorisë të nisë hetimet mbi çdo rast të denoncuar dhe të përfshirë në dokumentin final të Task Force.
“Në përfundim të procesit zgjedhor materiali përmbledhës që pasqyron gjetjet dhe konkluzionet e ministrive dhe të institucioneve të tyre të varësisë, dërguar me shkrim apo të diskutuara në mbledhjet e Task-Forcës, përbën produktin përfundimtar të punës që i shpërndahet anëtarëve të Task-Forcës, subjekteve zgjedhorë, OJF me objekt veprimtarie në fushën e zgjedhjeve si dhe partnerëve ndërkombëtarë e pjesëmarrësve të tjerë në proces.
Çdo e dhënë në materialin përmbledhës është një pasqyrim i saktë, i konsoliduar dhe sistematik i të gjithë informacionit dhe raportimeve në kohë të bëra veçmas nga secila Ministri, si organ kushtetues, në përputhje me sferën e përgjegjësisë shtetërore që mbulon”, thuhet në deklaratën e Ledina Mandijas. /tesheshi.com/
