Kryeministri Edi Rama ka nisur të shpërndajë titujt e pronësisë së tokave, 3 vje pas ardhjes në pushtet, pas kritikave të forta që ka marrë nga Bashkimi Europian se nuk ka ndërmarrë reformën e pronave.
Ligji që u hartua nga qeveria dhe u miratua në Kuvend nuk u firmos nga Presidenti Nishani, i cili e dërgoi në Kushtetuese.
Gjykata Kushtetuese ka caktuar datën 21 prill si kohë e zhvillimit të sencës gjyqësore ku do të përballen kreu i shtetit me qeverinë.
Ndërkaq, nga burime diplomatike mësohet se një raport i Bashkimit Europian i cili është hartuar nga viti 2005-2014 raporton se në Shqipëri është kryer një korrupsion gjigand në përmasa për çështjen e pronës.
Raporti i cili ndodhet në duart e qeverisë bën të ditura se duhen verifikuar të gjitha titujt e pronësisë që nga viti 1991.
Siç bën të ditur ky raport, janë gjithsej 10 mijë tituj pronësie, kryesisht në zonat turistike dhe në zonën industriale Tiranë-Durrës, të cilat janë të mbivendosura dhe kanë më shumë se 3 pretendentë.
Në mënyrë të posaçme, ky raport që është hartuar nga ana specialistëve të Gjykatës së Strasburgut, bën të ditur se “në Shqipëri ka pasur praktika korruptive në trajtimin e titujve të pronësisë. Në vitin 2010-të, Agjencia e Kthimit dhe Kompensimit të Pronës shkriu zyrat rajonale të saj dhe gjithçka trajtohej nga një dorë, duke rritur mundësinë e abuzimit dhe e kalimit në mënyrë të centralizuar tëdhënies së vendimeve. Një akt i AKKP-së është një vendim juridik që jep titullin e pronësisë”.
Por më pas, raporti vë një dyshim të madh edhe për gjyqësorin shqiptar, i cili ka konfirmuar pjesën më të madhe të titujve të pronësisë që janë marrë gjatë viteve 2010-2013.
Situata sipas Bashkimit Europian gjendet në një udhëkryq; dhe kritikohet qeveria shqiptare të Edi Ramës se për 3 vjet nuk ka lëvizur asnjë metër nga statukuoja aktuale.
Aktualisht, vendi është para një impasi të madh ku i duhet të paguajë shifra marramendëse parash nga si pasojë e vendimeve të Strasburgut. Qeveria po paguan edhe për vendimet që nuk janë zbatuar, duke paguar edhe interesat. Këto interesa janë rritur nga viti në vit dhe fatura është rënduar.
Në shifra të rrumbullaksuara bëhet fjalë për 40 milionë euro për rreth 200 çështje. /tesheshi.com/
