Tre ditë pas publikimit të raportit të BE-së për Ballkanin Perëndimor, aty ku u shpalos strategjia e zgjerimit, ka reaguar kreu demokrat Basha.
Për të, raporti ka qenë një radiografi e trishtë: “Ky raport është një radiografi e trishtuar e realitetit shqiptar dhe disa vendeve të tjera të Ballkanit”, thotë Basha, duke e parë më pas atë me syrin politik, si një fshikullim për qeverisjen e Ramës.
“Raporti flet qartë dhe më forcë për kapjen e shtetit nga interesat private dhe lidhjet mes krimit të organizuar dhe qeverisjes, për probleme të rënda dhe serioze të korrupsionit, për shkeljen e të drejtave të njeriut dhe lirisë së medias, për ekonomi jokonkuruese që duhet të reformohet thellësisht, për mungesën e zgjedhjeve të lira dhe të ndershme dhe për shtypjen e rolit të opozitës politike”, shprehet Basha.
Ai më tej thotë se opozita e mbështet plotësisht raportin, si dhe integrimin e Shqipërisë.
“Unë personalisht dhe bashkëpunëtorët e mi kemi lobuar dhe vazhdojmë të punojmë me partnerët tanë europianë që Shqipërisë t’i hapen negociatat. Ky është investimi ynë ndaj gjithë shqiptarëve dhe të ardhmes sonë të përbashkët.
Ne duam që negociatat të hapen edhe pse vendi përballet me shqetësime të rënda dhe serioze nga një sërë vendesh anëtare të BE-së në lidhje me krimin dhe drogën me origjinë nga Shqipëria dhe me emigracionin e paligjshëm nga bashkqytetarët tanë që kanë humbur shpresën dhe mundësitë të jetojnë në Shqipëri”, thekson kryedemokrati. /tesheshi.com/
