Nga Ylli Pata
Një raport ndërkombëtar i mbërritur në qeverinë shqiptare bën të ditur se janë djegur më shumë se 80 milionë euro projekte për fermerët vetëm nga korrupsioni.
Dokumenti ka mbi 4 muaj që është në duart e Edi Ramës dhe është dorëzuar nga ambasadorja e Bashkimit Europian në Tiranë, Romana Vllahutin. Në këtë raport “kryqëzohet” një institucion të drejtuar nga LSI-ja.
Siç bëjnë të ditur burime diplomatike, ky raport thekson se humbja e projekteve të BE-së në kuadër të fondit të para-anëtarësimit është pikërisht pasojë e korrupsionit në ministrinë e Bujqësisë, kryesisht në dhënien e tokave me qira për të përfituar këto projekte.
Disa vite më parë Bujar Zhuri, një shqiptar që jeton dhe punon prej kohësh në Norvegji, denoncoi në media një rast abuzimi.
Ai ka sjellë vite më parë një kompani norvegjeze për të investuar në bujqësi me rendiment të lartë, duke kërkuar toka me qira, kryesisht në zonën e Myzeqesë.
Por ai i tha agjencisë Birn se korrupsioni në ndarjen e tokave ka penguar që të vihen në përdorim teknikat e fundit që sjellin rritjen e rendimentit.
Kaluan tre vjet nga ky denoncim dhe sot tashmë kemi një raport të Bashkimit Europian për këtë çështje.
Përplasja ka ndodhur në qeverinë shqiptare, ku Kryeministri Edi Rama i ka kërkuar ministrit të Bujqësisë, Edmond Panariti që të zhbllokojë menjëherë fondet e destinuara për Shqipërinë.
Ndërkaq, ministri i Bujqësisë, Edmond Panariti, i ka kërkuar sot Bashkimit Europian që të jetë më fleksibël në ndarjen e fondeve.
“Nuk duam të vështirësojmë procesin, ai duhet të jetë fleksibël dhe miqësor. Kemi parë që një fermer është skualifikuar vetëm se ka shënuar në kutinë e gabuar në aplikim. Kjo nuk është mënyra e duhur. Këtij fermeri duhet t’i jepet një mundësi tjetër nëse ka bërë një gabim. Kërkojmë që procesi të jetë pjesëmarrës, jo përjashtues”, tha Panariti gjatë një takimi me ambasadoren e BE-së Romana Vllahutin.
Por, si diplomatja e BE-së, ashtu dhe zv. ambasadorja gjermane në Tiranë, deklaruan se korrupsioni ka risk të jenë të nivele të larta kur bëhet fjalë për shuma të mëdha financimi.
“Eksperienca tregon se parregullsitë dhe mashtrimi janë proporcionale me shumën e financimit të përfituar nga sektori. Prandaj është me shumë rëndësi të bëhen të gjitha përpjekjet që të parandalohen, evidentohen dhe përmirësohen parregullsitë e mashtrimet e mundshme në financimin në bujqësi. Këtu është vendi për të theksuar rolin e veçantë dhe përgjegjësinë që autoriteti përkatës ka për parandalimin, evidentimin dhe raportimin e parregullsive dhe mashtrimit”, tha ambasadorja e BE-së, Romana Vlahutin.
Ndërkaq, numri dy i ambasadës gjermane, Anke Holstein, mbështeti kolegen e saj: “Siç tha Romana, risku i korrupsionit kur bëhet fjalë për fonde të mëdha është shumë i lartë në shumë shtete, por në Shqipëri është si një ‘kancer’ me një numër të madh metastazash në të gjithë vendin dhe fatkeqësish ngado. Lufta kundër saj po vazhdon, edhe pse shpesh has në vështirësi. Të dhënat në luftën kundër korrupsionit janë një nga 5 prioritetet dhe çështja më e nxehtë është reforma në drejtësi, që përbën kusht për një luftë të suksesshme kundër korrupsionit dhe një hap të rëndësishëm për të ecur përpara në rrugën europiane”./tesheshi.com/
