Qytetarët e Prishtinës në përgjithësi janë të kënaqur me shërbimet komunale, punën e kryetarit të komunës dhe drejtorive komunale, ndërsa në listën e pakënaqësive dominojnë mungesa e parkingjeve publike, pamundësia për të lëvizur lirshëm në trotuare, mirëmbajtja e rrugëve, si dhe mungesa e aktiviteteve sportive dhe rinore.
Kështu thuhet në raportin “Indeksi i kënaqshmërisë së qytetarëve me shërbimet komunale në Prishtinë”, i publikuar sot nga Organizata Iniciativa për Progres (INPO).
Albulena Nrecaj, drejtoreshë ekzekutive në INPO, tha se mesatarja e aritmetike e kënaqshmërisë me të gjitha shërbimet komunale është 58.37 për qind, ndërsa mesatarja e pa kënaqshmërisë 34.23 për qind.
Më shumë se 3/4 e qytetarëve të Prishtinës janë të kënaqur me shërbimet e administratës komunale. Pajisja me dokumente të gjendjes civile, leje ndërtimore, leje biznesi vlerësohet të jetë efikase. 76 për qind të qytetarëve janë të kënaqur apo shumë të kënaqur me shpejtësinë dhe saktësinë e marrjes së këtyre shërbimeve.
“Në raport thuhet se cilësia e arsimit para-universitar është vlerësuar e kënaqshme nga qytetarët. 60 % janë deklaruar të kënaqur apo shumë të kënaqur, ndërsa 31 % kanë shprehur pa kënaqshmërinë me cilësinë e arsimit para-universitar”, tha Nrecaj.
Shpend Mustafa, hulumtues në INPO, tha se më shumë se gjysma e prishtinasve janë të kënaqur me shërbimet shëndetësore që ofrohen nga QKMF-ja.
“Infrastruktura e ambienteve shkollore vlerësohet pozitivisht nga qytetarët. Në përgjithësi qytetarët janë të kënaqur me shërbimet e ndërmarrjeve publike lokale, apo rajonale që bëjnë furnizimin me ujë dhe grumbullimin e mbeturinave. Po ashtu numri i shesheve dhe parqeve në Prishtinë është i kënaqshëm për më shumë se gjysmën e qytetarëve”, tha Mustafa.
/tesheshi.com/
