Nga Miradie Hasani
Gjendja e ndarjes etnike dhe urrejtja mes vete në Maqedoni është e thelluar, vlerëson komisari për të Drejtat e Njeriut i Këshillit të Evropës, Nills Muizhniek duke paralajmëruar se ndarja më e madhe është mes shqiptarëve dhe maqedonasve.
Ai thekson Maqedonia duhet të punojë më shumë në politika që nxisin integrim dhe mirëkuptim mes bashkësive etnike dhe se politikëbërësit janë ata që po i ndajnë qytetarët në baza etnike, duke bërë politika vetëm për grupe të caktuara të qytetarëve dhe jo për shoqërinë si tërësi.
“Është politika, persona që mobilizohen në frikë dhe mundohen të konsolidojnë grupin e tyre etnik kundër një grupi tjetër. Por është edhe mungesa për ti adresuar këto çështje me kohë. Nuk ndahen fëmijët, ato zakonisht ja kalojnë shumë mirë bashkë dhe mësojnë shpejtë gjuhë, por problemi është tek prindërit e tyre dhe politikanët”, tha Nills Muizhnieks.
Këtë shqetësim e thekson edhe Avokati i popullit, Ixhet Memeti , se shoqëria në Maqedoni është e ndarë dhe këto ndarësi vijnë si pasojë e politikës.
“Projektet të cilat duhet të ndihmojë kohezionin apo tolerancën, komunikimin, bashkëveprimin, për fat të keq keqpërdoren nga individ si dhe parti politike për qëllime politike dhe në vend që të ndihmojnë, ata ka raste kur shndërrohen në të kundërtën, bëjnë ndarësi”, tha Memeti.
Memeti thekson se edhe ligji për gjuhët po keqpërdoret nga liderët politikë për të thelluar ndarjen dhe në vend që të ketë tolerancë ndërgjuhësore, ligji për gjuhët kundërshtohet në formë histerike.
Këtë e dëshmon rasti i fundit në Maqedoni ku rreth 20 të rinj pas një përleshjeje fizike në autobus u shoqëruan në polici. në drejtim të autobusit u hodhën gurë, u thyen dy dritare ndërsa një 15-vjeçar mbeti i lënduar.
Ministrja e Arsimit dhe Shkencës, Renata Deskovska, për dhunën mes nxënësve fajëson qeverinë e kaluar për krijimin e një atmosfere të mos durimit dhe nacionalizmit.
“Kjo sipas meje, është rezultat i krijimit të një atmosfere që ekzistonte në periudhën e fundit, atmosferë e mos durimit, atmosferë e zgjimit të nacionalizmit, atmosferës së urrejtjes ndëretnike dhe kjo ishte përditshmëri të cilën e shihnim të vinte nga zyrtarët më të lartë shtetërorë”, tha Deskovska. /tesheshi.com/
