Një raport sekret i policisë greke, i publikuar nga mediat, flet mbi kontrollin e grupeve kriminale shqiptare në trafikun e lëndëve narkotike.
Sipas raportit, krimi i organizuar shqiptar shfaqet si një nga kërcënimet kryesore për vendet e BE-së, me gjithë përpjekjet që janë bërë për përballimin e tij. Raporti përfshin të dhëna nga Europol dhe policia greke, ndërsa evidentohet se veprimtaria kryesore e grupeve kriminale shqiptare është trafikimi i drogës nga Shqipëria drejt Greqisë dhe Italisë.
Prej janarit të vitit 2016, më shumë se 15.5 tonë hashash janë sekuestruar në territorin grek, prej të cilave 6.8 tonë vetëm në 6 muajt e fundit.
Në faqe të veçanta të raportit, pjesë të të cilit publikon për herë të parë dhe ekskluzivisht gazeta “Kathimerini”, përveç hashashit, mafia shqiptare trafikon edhe heroinën e kokainën që vijnë nga Afganistani, Turqia, apo vendet e Amerikës Latine, me destinacion më pas shtetet e Europës Juglindore.
Një sektor tjetër ku grupet kriminale shqiptare dominojnë është trafikimi i qenieve njerëzore dhe vjedhja e makinave luksoze, që çohen më pas në Shqipëri dhe Kosovë, raportion TCH.
Policia greke i përshkruan këta kriminelë si tepër të dhunshëm, të pamëshirshëm, që nuk ngurrojnë të përdorin armët dhe të marrin jetë, ndërsa ka informuar shpeshherë edhe organet shqiptare për aktet kriminale të regjistruara në vend.
Nga viti 2010 deri në 2015-n janë zbardhur rreth 16.750 vjedhje dhe bastisje shtëpish me autorë kriminelë shqiptarë, 3.158 vjedhje makinash, 4.347 çështje trafikimi droge dhe 478 vrasje. Përveç qytetarëve grekë, viktima të këtyre rasteve kriminale në këto vite kanë qenë edhe gati 10 mijë shtetas shqiptarë që banojnë në Greqi. /tesheshi.com/
