Partitë politike në Shqipëri shprehin publikisht vullnetin për të zbatuar rekomandimet e misioneve vëzhguese të zgjedhjeve, por në fund askush nuk i ka zbatuar ato. Shefja e misionit vëzhgues ndërkombëtar që ishte në Shqipëri për zgjedhjet lokale të këtij viti, Audrey Glover raportoi në këtë mënyrë situatën përpara eurodeputetëve në komitetin e Jashtëm të parlamentit Europian.
Duke dhënë konkluzionet përfundimtare për procesin e zgjedhjeve lokale 2015, Glover deklaroi se mund të ishte bërë më shumë sa i takon standardave.
“Pavarësisht parregullësive, kuadri ligjor mund të ofronte bazën për zgjedhje demokratike. Megjithatë, partitë kryesore keqpërdorën shtrirjen e pushtetit dhe të përgjegjësisë së tyre brenda administratës zgjedhore dhe mungoi vullneti politik për ta zbatuar atë efektivisht”, deklaroi Glover.
“Një punë impresionuese mund të arrihet vetëm nëse komuniteti ndërkombëtar punon së bashku për të plotësuar detyrën e vet, duke mënjanuar kështu dublikimet”, tha ajo. Ndërkohë, konkluzionet e raportit përfundimtar të vëzhguesve të huaj pritet të përfshihen në raportin vjetor të Komisionit Europian për Shqipërinë.
Ambasadorja e BE në Tiranë, Romana Vlahutin, nga ana e saj, ka vënë në dukje se ende nuk ka një raport monitorues për financimin e partive në zgjedhje.
Seanca dëgjimore ka kaluar pa ndonjë debat, ndërsa raportuesi për Shqipërinë, Knut Fleckenstein theksoi se rekomandimet që duhej të ishin zbatuar kohë më parë, nuk janë zbatuar.
Ambasadorja e BE-së në Tiranë, Romana Vlahutin njoftoi se gjatë këtij muaji nis dhe puna për përgatitjen e zgjedhjeve të ardhshme të 2017-s dhe se pret ngritjen e një komisioni të posaçëm ad-hoc për këtë qëllim. /tesheshi.com/
