Raporti i dy ditëve të fundit për arsimin në nivel global, ku mori pjesë edhe vendi ynë, ka hapur një debat të ri mes kryeministrit Rama dhe kreut të opozitës, Lulzim Basha.
Ky i fundit deklaroi sot para të rinjëve, që merrnin pjesë në protestën e 8 dhjetorit se raportet që publikon qeveria janë të manipuluara.
“Populli nuk jeton duke lexuar raporte, rinia nuk arsimohet duke lexuar raporte. Aq më pak raporte të porositura e të paguara për ta bërë të zezën të bardhë. E zeza e bardhë nuk bëhet kurrë me propagandë, nuk bëhet kurrë me mashtrime”, u shpreh, ndër të tjera Basha.
Pak minuta më vonë, ka ardhur reagimi i kryeministrit në Twitter. Duke irozinuar fjalën e kreut të PD-së, Rama shkruan se: “Sipas Lulit edhe PISA 2015 ka përkthyer gabim rezultatet e Shqipërisë në arsim! E kanë paguar! Dikush t’i thotë që paraja nuk është gjithçka”.
Shkrimi i kryeministrit vjen pas deklaratave të Partisë Demokratike se ligji i Vetting-ut duhet rishikuar nga komisioni i Venecias, pasi ishte përkthyer gabim në gjuhën angleze. Ky fakt u hodh poshtë një ditë më parë nga vetë Venecia.
PISA njihet ndryshe si programi për vlerësimin ndërkombëtar të nxënësve, të moshës 15-vjeçare, të cilët janë nënshtruar testeve në letërsi, shkencë dhe matematikë. Sipas këtij raporti, në 72 shtete të botës që morën pjesë, Shqipëria u rendit në vendin e 51./tesheshi.com/
