Një raport i parlamentarëve britanikë bën fajtorë ish-kryeministrin britanik, David Cameron, dhe ish-presidentin francez, Nicolas Sarkozy, për një ndërhyrje të keqmenduar në Libi në vitin 2011, me pasoja katastrofike për vendin.
Ndërhyrja ushtarake britanike në Libi në vitin 2011, e urdhëruar nga Cameron-i, u mbështet në informacione të pasakta dhe e shpejtoi kolapsin politik dhe ekonomik të vendit afrikanoverior, thuhet në raport.
“Aksionet e Mbretërisë së Bashkuar në Libi ishin pjesë e një ndërhyrjeje të keqmenduar,” është shprehur Crispin Blunt, një anëtar i konservatorëve britanikë, e njëkohësisht drejtues i Komisionit të Çështjeve të Jashtme.
Në raport fajësohet dhe qeveria e ish-presidentit francez, Nicola Sarkozy, për shpejtim të operacionit dhe për përdorim të informacionit të pasaktë mbi rrezikun me të cilin prëballeshin civilët në atë kohë.
Britania dhe Franca qenë në krye të përpjekjeve ndërkombëtare në muajt e parë të vitit 2011 për rrëzimin e Muammer Gaddafit në Libi, duke përdorur bombarduesit ajrorë për të goditur ushtrinë e udhëheqësit libian.
Cameron dhe Sarkozy u panë dorë më dorë me udhëheqësin e Këshillit Kombëtar Tranzicional të Libisë në Bengazi më 15 shtator 2011, si nxitësit kryesorë të largimit nga pushteti të Gaddafit.
Raporti i parlamentarëve britanikë thotë se Cameron kishte rol vendimtar në vendimin për të ndërhyrë në Libi, dhe duhet të mbajë përgjegjësi për rolin e Britanisë në krizën libiane.
Dështimet në ndërhyrjen në Libi e kanë bërë vendin një shtet të dështuar, në prag të luftës civile.
Cameron nuk ka pranuar të dëshmojë para komisionit, duke e fajësuar në të njëjtën kohë popullin libian për gjithçka po ngjet atje.
“Rezultati i ndërhyrjes franceze, britanike dhe amerikane ishte kolapsi politik dhe ekonomik…” ka nxjerrë si konkluzion raporti. /tesheshi.com/
