Avokati i Popullit (Ombdusmani) në Maqedoni, Ixhet Memeti duke prezantuar raportin vjetor lidhur me funksionimin e institucioneve publike bëri të ditur se krahasuar me vitin 2016, në këtë tremujor nuk ka asnjëfarë zhvillimi, përkundrazi ka stanjacion dhe përkeqësim të situatës.
Ashtu siç tha ai, institucionet nuk bashkëpunojnë sa duhet me Avokatin e Popullit dhe ende ka institucione të politizuara dhe jo-funksionale të cilat zbatojnë axhenda politike.
Ai thotë se po shpeshtohen edhe ankesat për projektin “Termini im” i cili krijoi kaos në shëndetin publik.
“Për shkak të pengesës së punës nga ana e ministrisë së Punës dhe Politikës Sociale, Shëndetësisë, MPB-së, Drejtësisë dhe DAP-it, Avokati i Popullit nuk mund që të zbatojë procedura të plota për të drejtat e qytetarëve”, konstatoi Memeti.
Memeti tha se burgjet edhe më tej janë skajshmërisht me kushte jo-njerëzore, duke u shkurtuar të drejtën e mbrojtjes shëndetësore të dënuarve. Ai gjithashtu theksoi se është konstatuar shfrytëzimi i forcës së tepërt nga ana e policisë së burgut, por edhe është theksuar brutaliteti policor gjatë protestave të “Revolucionit Laraman”.
Avokati popullor gjatë vitit të kaluar ka vepruar në 4.718 raste, janë pranuar 3.775 ankesa, ndërsa 37 janë hapur me iniciativë të tij. /tesheshi.com/
