Investimet e huaja direkte janë bërë përcaktuese për ecurinë e ekonomisë shqiptare. Ky është një nga konkluzionet e OKB, që i referohet nivelit të investimeve në disa nga vendet e rajonit.
Në vitin 2016, investimet e huaja në Shqipëri ishin 1 miliardë e 124 milionë dollarë. Kjo do të thotë se, një në çdo 3 lekë që investohet në ekonominë shqiptare, tashmë vjen nga jashtë. Sipas OKB, kjo është një nga normat më të larta në vendet e rajonit.
Në Bosnje, kapitali i huaj financon vetëm 10 % të investimeve totale në ekonomi; në Bullgari 7.8 për qind, ndërsa mesatarja e Europës Juglindore është 26.3 për qind.
Ndikimi i investimeve të huaja në ekonominë shqiptare është rritur sidomos në 5 vitet e fundit.
Sipas INSTAT-it, në vitet 2015-2016 investimet, veçanërisht projektet e mëdha me kapital të huaj, si gazsjellësi transadriatik dhe kaskada e Devollit, ishin burimi kryesor i rritjes ekonomike, raporton TCH.
Shqetësimi më i madh i ekspertëve është se çfarë ndodh pas përfundimit të këtyre dy projekteve.
“Moody’s” paralajmëroi se investimet e huaja në Shqipëri mund të ulen gjatë viteve në vijim, nëse vendi nuk do të forcojë institucionet dhe klimën e biznesit. /tesheshi.com/
